Qaraǵandy oblysynda 900 keliden astam esirtki tárkilendi

QARAǴANDY. KAZINFORM — Qaraǵandy oblysynyń polıtsııa departamenti qoǵamdyq qaýipsizdikti qamtamasyz etý jáne esirtki qylmystaryna qarsy kúresti kúsheıtý maqsatynda «Zań jáne tártip» qaǵıdatyn dáıekti túrde júzege asyryp keledi, dep habarlaıdy Polisia.kz.

1 maýsym men 31 qazan aralyǵynda óńir aýmaǵynda keń aýqymdy «Qarasora» arnaıy jedel-aldyn alý is-sharasy ótkizildi. Onyń nátıjesinde 100 esirtkige qatysty quqyq buzýshylyq anyqtaldy, sonyń ishinde 55 qylmys jáne 45 qylmystyq teris qylyq tirkeldi.

— Zańsyz aınalymnan 900 keliden astam ártúrli esirtki zaty men 1,5 tonna prekýrsor tárkilendi. 72 adam jaýapkershilikke tartyldy, olardyń arasynda 5 áıel men 3 kámeletke tolmaǵan jasóspirim bar, — deıdi oblystyq polıtsııa departamenti bastyǵynyń birinshi orynbasary Qýanysh Orynbetov. 

Polıtseılerdiń úılesimdi jumysynyń nátıjesinde eki jasyryn esirtki zerthanasy joıylyp, uıymdasqan qylmystyq toptyń qyzmeti toqtatyldy. 

• 25 derek — esirtki satý faktisi;
• 16 derek — esirtkini nasıhattaý jáne jarnamalaý;
• 5 derek — esirtki ósimdikterin zańsyz ósirý;
• esirtki tutynýǵa arnalǵan prıton uıymdastyrý boıynsha bir derek tirkeldi.

«Kıberbaqylaý» aqparattyq júıesine esirtki jáne psıhotroptyq zattarǵa qatysty tyıym salynǵan kontent taratqan 881 ınternet-resýrs, ıaǵnı veb-saıttar, akkaýnttar jáne ózge de platformalar engizildi.

Sonymen qatar «Anti-Fraud» júıesi arqyly jalpy somasy 68 mıllıon teńgeden asatyn 1019 bank kartasy buǵattaldy. Telegram messendjeri arqyly esirtkiniń zańsyz aınalymynda paıdalanylǵan 4102 krıptovalıýtalyq ámııan anyqtaldy.

Esirtki qylmystarynyń aldyn alý baǵytynda 1350 profılaktıkalyq is-shara ótkizilip, olarǵa 152 myńnan astam azamat qatysty. Qoǵamdyq uıymdar men belsendilerdiń qatysýymen 476 reıdtik is-shara uıymdastyrylyp, olardyń barysynda 11 myńnan astam esirtkige qatysty graffıtı jazbalar joıyldy.

Buǵan deıin Qaraǵandyda sıntetıkalyq esirtki óndirýmen aınalysqan qylmystyq top ustalǵan bolatyn.