Qaraǵandy oblysynda 860-tan astam múgedektigi bar azamat jumysqa ornalasty
QARAǴANDY. KAZINFORM – Qaraǵandy oblysynda jyl basynan beri 860-tan astam múgedektigi bar azamat jumyspen qamtyldy.
Óńir ákimdiginiń málimetinshe, bul sanatty jumysqa ornalastyrý úshin barlyq tetikter qoldanylýda: bos jumys oryndaryna joldama berý, arnaıy jumys oryndaryn qurý, sondaı-aq kásip bastaýǵa arnalǵan granttar qarastyrylǵan. Bıyl múgedektigi bar adamdarǵa arnalǵan jumys oryndarynyń kvotasy 291-ge deıin ulǵaıtyldy.
Oblys ákimi Ermaǵanbet Bólekpaev bul baǵyttaǵy jumysty kúsheıtý qajet ekenin atap ótti.
– Bul máselemen belsendi túrde aınalysyp, tásilderdi qaıta qaraý qajet. Bizde jańa kásiporyndar ashylyp jatyr, sol jerlerde de múgedektigi bar adamdar úshin jumys oryndaryn qurýǵa bolady. Naqty usynystarmen jumys isteńizder. Áleýmettik qoldaý jáne olardyń ómir súrý sapasyn arttyrý – bizdiń basym baǵyttarymyzdyń biri. Kvotany ulǵaıtyp, aqparattyq jumysty kúsheıtý qajet, – dedi óńir basshysy.
Jumyspen qamtýdy úılestirý jáne áleýmettik baǵdarlamalar basqarmasynyń deregine sáıkes, oblysta 54 690 múgedektigi bar adam tirkelgen, olardyń jartysy eńbekke jaramdy.
– Jyl basynan beri kvota sheńberinde 153 adam jumysqa ornalasty. Bul úderisti tolyq baqylaıtyn avtomattandyrylǵan júıe jumys isteıdi. Elektrondyq eńbek bırjasynda kvota belgilengen jumys berýshilerdiń tizimi jarııalanǵan. Mansaptyq ortalyqtar jumys izdeýshilerge belsendi túrde qoldaý kórsetýde, – dedi basqarma basshysy Ǵalymjan Spabekov.
Sondaı-aq óńirde JOB COACH jańa jobasy iske qosylǵan. Joba aıasynda mamandar múmkindigi shekteýli jandardy jumys ornyna tolyq beıimdelgenge deıin súıemeldeıdi.
– Qaraǵandy qalasynda múgedektigi bar azamattarǵa keńes berý jáne jumysqa ornalastyrý ortalyǵyn ashý josparlanyp otyr, – dep atap ótilgen.
