Qaraǵandy oblysynda 850 avtokólik qar qursaýynda qaldy
QARAǴANDY. KAZINFORM — Qaraǵandy oblysynda qatty boran óńirdegi kólik qozǵalysyn turalatyp, respýblıkalyq jáne oblystyq mańyzy bar tasjoldar jabyldy. Eń kúrdeli jaǵdaı Qaraǵandy — Astana baǵytynda qalyptasty.
22 aqpannan bastap aımaqta aýa raıy kúrt nasharlap, qatty boran soǵyp, joldyń kórinýi tómendedi. Qaýipsizdik sharasy retinde barlyq respýblıkalyq jáne oblystyq mańyzy bar avtojol ýaqytsha jabyldy.
Shekteýler saldarynan joldarda shamamen 500 jeńil kólik, 350-ge jýyq júk kóligi jáne 20-ǵa tarta avtobýs jınalyp qaldy. Jalpy sany eki myńǵa jýyq adam jol ústinde qalǵan. Eń kúrdeli ahýal Qaraǵandy — Astana tasjolynda tirkelip, munda 700-ge jýyq avtokólikten quralǵan uzyn kolonna túzildi.
23 aqpan kúni saǵat 14:00–den bastap patrýldik polıtsııa batalonynyń qyzmetkerleri kólik kolonnalaryn uıymdasqan túrde alyp júrý jumystaryn bastady. Aýa raıy jaǵdaıynyń birshama turaqtanýyna baılanysty Temirtaý — Astana baǵyty boıynsha qozǵalys polıtsııa baqylaýymen kezeń-kezeńimen qaıta jandandy.
Patrýldik polıtsııa batalony vzvodynyń komandıri Dáýren Ábdishevtiń aıtýynsha, keıbir ýchaskelerde qar úıindileri saqtalyp, kóriný deńgeıi áli de tómen. Bul jol qozǵalysyn erekshe baqylaýdy jáne qyzmetterdiń úılesimdi is-qımylyn talap etedi.
— Negizgi mindet — azamattardyń qaýipsiz qozǵalysyn qamtamasyz etý jáne kólikterdi dittegen jerine aman-esen jetkizý, — dep atap ótti ol.
Qazir polıtsııa bólimsheleri jol jaǵdaıyn qatań baqylaýda ustap, kúsheıtilgen rejımde jumys istep jatyr.
Júrgizýshilerge beriletin usynymdar:
- avtojoldardyń ýaqytsha jabylýy týraly resmı aqparatty turaqty túrde qadaǵalaý;
- jolǵa shyǵar aldynda aýa raıy boljamyn jáne trassalardyń jaı-kúıin naqtylaý;
- daýyldy eskertýler jarııalanǵan kezde alys saparlardan bas tartý;
- kólikti qysqy shınalarmen jáne qajetti apattyq jıyntyqpen (jyly kıim, aýyzsý, dári qobdıshasy, baılanys quraldary) jabdyqtaý;
- kóriný shektelgen jaǵdaıda jyldamdyqty tómendetip, araqashyqtyqty saqtaý.
Polıtsııa departamenti qolaısyz aýa raıy jaǵdaıynda oılanbaı jolǵa shyǵý adamdardyń ómiri men densaýlyǵyna eleýli qaýip tóndirýi múmkin ekenin eskertedi.
Buǵan deıin «QazAvtoJol» ulttyq kompanııasy elimizdegi avtomobıl joldaryndaǵy ahýal men 23 aqpanda qaı baǵyttardyń jabyq nemese ashyq ekeni jóninde aqparat taratqan bolatyn.