Qaraǵandy oblysynda 76 ınvestordyń problemalyq máselesi sheshildi
QARAǴANDY. KAZINFORM – Qaraǵandy oblysynyń prokýratýrasy ınvestorlardyń quqyqtaryn qorǵaý baǵytynda 76 kásipkerdiń problemalyq máselesin sheshti.
Prokýratýranyń front-ofısi men qadaǵalaý qyzmetiniń jumysy aıasynda 76 ınvestordyń máselesi sheshilgen. Atap aıtqanda, problemalar ruqsat qujattaryn alý, jer ýchaskelerin bólý jáne ınjenerlik jelilerge qosylý máselelerine qatysty bolǵan.
- Sonymen qatar bızneske negizsiz ákimshilik qysymnyń aldyn alýǵa baǵyttalǵan «prokýrorlyq súzgi» tetiginiń tıimdiligi atap ótildi. Ony engizgen sátten bastap memlekettik organdardyń 1235 sheshimi qaralyp, onyń 120-dan astamy kelisilmegeni anyqtalǵan. Nátıjesinde ınvestorlar 370 mln teńge kólemindegi negizsiz aıyppul tóleýden bosatyldy, - delingen aqparatta.
Oblys prokýrory Investorlardyń quqyqtaryn qorǵaý komıtetiniń mindetterin aıqyndap, ınvestıtsııalyq prokýrordyń ınvestor men memleket arasyndaǵy baılanystyrýshy býyn retindegi rólin atap ótti.
Investorlardyń quqyqtaryn qorǵaý jáne ınvestıtsııalyq jobalardy súıemeldeý jumystary prokýratýra organdarynyń turaqty baqylaýynda ekeni aıtyldy.
Aıta keteıik, Qaraǵandy oblysyndaǵy kásiporynǵa 2,6 mln teńge aıyppul salyndy.