Qaraǵandy oblysynda 70-ten astam aýyl alkogolden bas tartty
QARAǴANDY. KAZINFORM – Qaraǵandy oblysynda «Іshimdiksiz aýyl» jobasy keńeıtilip jatyr. Joba óńirdegi ondaǵan eldi mekende naqty nátıje kórsetken. Bılik pen polıtsııa turmystyq qylmystardyń azaıǵanyn atap ótip, alkogol ónimderiniń satylýyn baqylaýdy kúsheıtýdi josparlap otyr.
Óńirde quqyq buzýshylarǵa qatysty jańa shekteýler de qarastyrylyp jatyr. Atap aıtqanda, alkogol ónimderine aktsız mólsherin arttyrý, sondaı-aq quqyqbuzýshylyqtar jıi tirkeletin dúkender men kóńil kóterý oryndary úshin arnaıy antıreıtıng engizý usynylyp otyr.
Qaraǵandy oblysynda «Іshimdiksiz aýyl» jobasy aıasynda 74 aýyl alkogolden tolyqtaı bas tartqan.
Polıtsııanyń málimetinshe, bul bastama aıtarlyqtaı áleýmettik nátıje bergen. Atalǵan eldi mekenderde turmystyq janjaldar men spırttik ishimdik tutynýǵa baılanysty qylmystar tirkelmegen.
Oblystyq polıtsııa departamentiniń bastyǵy Nyǵmet Ismaǵulovtyń aıtýynsha, oń ózgerister jobany óńir boıynsha ári qaraı keńeıtýge negiz bolǵan.
— Bul aýyldarda otbasylyq-turmystyq janjaldar men alkogol tutynýǵa baılanysty qylmystar tirkelmeıdi. Sondyqtan jobany odan ári aýqymdy túrde jalǵastyrý usynylady, - dedi departament basshysy.
Quqyq qorǵaý organdarynyń málimetinshe, qazirgi tańda turmystyq zorlyq-zombylyqtyń, qoǵamdyq tártipti buzýdyń jáne alkogol ónimderin zańsyz satýdyń aldyn alýǵa erekshe kóńil bólinip otyr.
Bılik ókilderi ishimdikten bas tartý tek qylmys deńgeıin tómendetip qana qoımaı, aýyldardaǵy jalpy qoǵamdyq ahýaldy jaqsartýǵa da yqpal etedi dep sanaıdy.
Sonymen qatar memlekettik deńgeıde alkogol naryǵyn retteýge qatysty qosymsha sharalar talqylanyp jatyr. Usynystar qatarynda spırttik ónimderge salynatyn aktsızderdi kóterý, saýda oryndaryn baqylaýdy kúsheıtý jáne kásipkerlerge qoıylatyn talaptardy qatańdatý bar.
Ásirese qoǵamdyq tártip jıi buzylatyn aýla dúkenderi men oıyn-saýyq oryndary erekshe baqylaýǵa alynýy múmkin. Mundaı nysandar úshin arnaıy antıreıtıng engizý usynylyp otyr. Júıeli túrde tirkeletin quqyqbuzýshylyqtar saýda oryndarynyń ári qaraı jumys isteýine jáne bedeline áser etýi yqtımal.
Polıtsııa ókilderi mundaı bastamalardyń basty maqsaty negizsiz tyıym salý emes, turǵyndar úshin qaýipsiz orta qalyptastyrý jáne mas kúıinde jasalatyn qylmystar sanyn azaıtý ekenin atap ótti.
Osyǵan deıin Qyzylorda oblysynda ishimdiksiz aýyldar sany 37-ge jetkenin habarlaǵan bolatynbyz.
