Qaraǵandy oblysynda 5,2 mln teńgeden asatyn zańsyz aıyppuldyń kúshi joıyldy
QARAǴANDY. KAZINFORM – Qaraǵandy oblysynyń prokýratýrasy ınvestorlardyń quqyqtaryn qorǵaý aıasynda kásipkerlerge zańsyz qysym kórsetý áreketteriniń jolyn keskenin málimdedi.
Vedomstvo málimetinshe, bul jumys Bas prokýratýranyń Investorlardyń quqyqtaryn qorǵaý komıtetimen birlesip júzege asyrylyp jatyr. Negizgi tetik retinde «prokýrorlyq súzgi» qoldanylady.
Atalǵan mehanızm aıasynda memlekettik organdar men kvazımemlekettik sektor sýbektileri ınvestorlarǵa qatysty tekserý taǵaıyndaý, ákimshilik is qozǵaý nemese sotqa talap qoıý sekildi shekteý sharalaryn prokýratýramen mindetti túrde kelisýi tıis.
Jyl basynan beri «prokýrorlyq súzgi» arqyly 163 sheshim ótken. Onyń ishinde 21 materıal boıynsha kásipkerlerge zańsyz ákimshilik shara qoldaný áreketiniń aldyn alý múmkin bolǵan.
Prokýrorlardyń aralasýy nátıjesinde:
– 4 negizsiz tekserý toqtatyldy;
– «Saryarqa» arnaıy ekonomıkalyq aımaǵyna qatysýshymen shartty buzýǵa jol berilmedi;
– 5,2 mln teńgeden asatyn zańsyz aıyppuldardyń kúshi joıyldy.
Prokýratýra mysal retinde gofr karton qaptamalaryn óndirý jobasyn júzege asyryp jatqan «TPA SARY ARKA» JShS-in keltirdi.
Qadaǵalaý organy kásiporynǵa qatysty tekserý Kásipkerlik kodeksiniń talaptaryn buza otyryp, quqyqtyq statıstıka organdarynda mindetti tirkeýsiz bastalǵanyn anyqtaǵan.
Prokýrorlyq den qoıý sharalarynan keıin eki laýazymdy tulǵa tártiptik jaýapkershilikke tartyldy.
Sonymen qatar prokýratýra narazylyǵy negizinde sanıtarlyq-epıdemıologııalyq baqylaý organdary qajetti ruqsatsyz júrgizgen úsh zańsyz baqylaýly satyp alý nátıjesiniń kúshi joıylǵan.
Qaraǵandy oblysynyń prokýratýrasy ınvestorlardy qorǵaý men ashyq ınvestıtsııalyq orta qalyptastyrý qadaǵalaý qyzmetiniń basym baǵyty bolyp qala beretinin atap ótti.
Prokýratýra ákimshilik kedergilerge tap bolǵan ınvestorlardy +7 (701) 544-08-59 jáne 115 call-ortalyǵyna habarlasýǵa shaqyrdy.
Aıta keteıik, óńirdegi Topar MAES-ine atmosferaǵa shyǵarylǵan zııandy zattar úshin aıyppul salyndy.
