Qaraǵandy oblysynda 400-den astam ınternat oqýshysynyń quqyǵy buzylǵan

QARAǴANDY. KAZINFORM – Shet aýdanynyń prokýratýrasy osy aýdandaǵy Y.Altynsarın atyndaǵy qoldaý mektebi janyndaǵy «Internat» KMM qyzmetine keshendi tekserý júrgizdi.

Prokýratýranyń málimetinshe, resýrstyq ortalyq ǵımaratynyń keshenine jaqyn mańdaǵy aýyldardan kelgen 100 oqýshynyń turýyna qoıylatyn talaptarǵa saı keletin 3 qabatty jataqhana kiredi. 2022 jyldyń sońynda komıssııa sheshimimen, sanıtarlyq-epıdemıologııalyq qorytyndysyz, balalar jataqhanadan shyǵarylyp, balalardyń turýyna arnalmaǵan Resýrstyq ortalyq ǵımaratynyń 2-qabatyna ornalastyrylǵan.

Oqý kabınetteriniń sanynyń azaıýy, keıbir kabınetterdiń sharýashylyq bólmelerge aınalýy oqýshylardyń oqý, demalys oryndarynyń, sanıtarlyq toraptardyń, qoǵamdyq tamaqtaný oryndarynyń jáne t.b. alańdarynyń belgilengen normalarynyń buzylýyna ákelgen.

Tekserý jataqhananyń 2-qabatynda «Shet aýdanynyń bilim bólimi» MM ornalasqany, al 3-qabatynda bilim bóliminiń meńgerýshisi, memlekettik mekeme qyzmetkerleri men ádiskerleri úshin jataqhana uıymdastyrylǵanyn kórsetti. Atalǵan fakt kópshilik halyqtyń narazylyǵyn týdyrǵan. 

Prokýrorlyq qadaǵalaý aktisine sáıkes, balalar jataqhana ǵımaratyna qaıta ornalastyrylyp, resýrstyq ortalyqtyń jatyn bólmeleri qaıtadan oqý kabınetterine aınaldyrylǵan. 

Qazir Ortalyqta oqıtyn 412 bala úshin sapaly bilim alýǵa qaıta jaǵdaı jasaldy. 

Kináli tulǵalar zańda belgilengen jaýapkershilikke tartyldy.