Qaraǵandy oblysynda 400 aýyl turǵyny sapaly aýyz sýmen qamtamasyz etiledi
ASTANA. KAZINFORM — Aldaǵy ýaqytta qaraǵandylyqtar 100% aýyz sýmen qamtamasyz etiledi. Bul týraly Úkimettiń baspasóz qyzmeti habarlady.
Qaraǵandy oblysynda qaıtarylǵan aktıvterden túsken qarajat sýmen jabdyqtaý júıelerin damytýǵa jáne kommýnaldyq ınfraqurylymdy jańǵyrtýǵa baǵyttaldy. Bul maqsatqa Prezıdent Qasym-Jomart Toqaevtyń tapsyrmasy boıynsha Arnaýly memlekettik qordan 5 mlrd teńgeden astam qarajat bólindi.
Óńirde turǵyn úı-kommýnaldyq sharýashylyq salasynda toǵyz joba júzege asyrylyp jatyr. Halyqty sapaly aýyz sýmen qamtamasyz etý maqsatynda iri sý qubyrlary men eldi mekender ishindegi sý qubyry jelileriniń qurylysy basty nazarda tur. Solardyń biri — bıyl mamyr aıynda qubyr tartý jumystary bastalǵan Osakarov aýdanyndaǵy Kolhoznoe aýyly. Qurylys jumystary qarasha aıynda aıaqtalýǵa tıis. Jeliler paıdalanýǵa berilgennen keıin 400 aýyl turǵyny sapaly aýyz sýmen qamtamasyz etiledi.
— Bizde 20 jyldan astam ýaqyttan beri sý qubyry bolǵan joq. Sýdy uńǵymadan tasımyz. Endi mine, bıyl bizge jańa sý qubyryn salyp jatyr. Bul turmysymyzdy edáýir jeńildetpek, — dedi aýyl turǵyny Olga Sandalıdı.
Sondaı-aq oblys ortalyǵynda sýmen jabdyqtaý boıynsha aýqymdy jobalardy júzege asyrý jumystary jalǵasyp jatyr. Qaıtarylǵan qarajattyń arqasynda qaladaǵy mańyzdy ınfraqurylymdyq máseleler sheshimin taýyp jatyr.
Іri jobalardyń biri — Tereshkova aınalymynan ekinshi aımaqtaǵy (Shyǵys-5 aýdanynda) sorǵy stansasyna deıingi sý tartý jelisiniń qurylysy. Jelileriniń uzyndyǵy — 7 shaqyrym. Jańa nysan Maıqudyq, Jańa qala jáne Mıhaılovkadaǵy 200 myńnan astam turǵyndy turaqty túrde aýyz sýmen qamtamasyz etpek.
Sondaı-aq qaıtarylǵan aktıvter esebinen Jańa Tıhonovka men Eski Tıhonovkada sý qubyry jelileriniń qurylysy júrgizilip jatyr. Jańa Tıhonovkada uzyndyǵy 20 shaqyrymnan asatyn jańa sý qubyry jelileri tartylyp jatyr. Bul 4 myńǵa jýyq turǵyndy ortalyqtandyrylǵan sý júıesine qosýǵa múmkindik beredi. Eski Tıhonovkada 4 shaqyrymnan astam jeli tartý jumystary júrgizilip jatyr — nátıjesinde 146 úıge sý tartylady.
Qazan aıynyń sońyna deıin barlyq baǵyt boıynsha qurylys jáne montaj jumystaryn tolyq aıaqtaý josparlanǵan. Qarasha aıynda jelilerge gıdravlıkalyq synaq jasalyp, zalalsyzdandyrý sharalary júrgiziledi. Osydan keıin turǵyndar tehnıkalyq sharttardy alyp, sý júıesine qosyla alady.
Atalǵan jobalar júzege asyrylǵannan keıin qaraǵandylyqtar 100% aýyz sýmen qamtamasyz etiledi.
Arnaýly memlekettik qor qarajaty esebinen sý qubyry jelileri salynyp jatqan basqa da eldi mekender qatarynda Qarqaraly aýdanynyń Aqterek aýyly, Temirtaý qalasyndaǵy Sotsqalashyq, Oń jaǵalaý, Sol jaǵalaý jáne Eski qala aýdandary, Abaı aýdanynyń Sadovoe aýyly, sondaı-aq Kókteńkól stansasy (№ 56 razezd) jáne Shet aýdanyndaǵy Álıhan aýyly bar. Barlyq jumystardy jyl sońyna deıin aıaqtaý josparlanǵan.
Aıta ketelik Qaraǵandy oblysynda qaıtarylǵan aktıvter esebinen 51 medıtsınalyq nysan salynǵan edi.