Qaraǵandy oblysynda 35 myńnan astam úı gazben qamtamasyz etilmek
QARAǴANDY. KAZINFORM — Qaraǵandy oblysynyń Temirtaý qalasynda QR Energetıka vıtse-mınıstri Suńǵat Esimhanov óńir turǵyndarymen kezdesý ótkizip, energetıkalyq ınfraqurylym nysandaryndaǵy jumys barysymen tanysty. Bul týraly Energetıka mınıstrligi málim etti.
Kezdesý barysynda vıtse-mınıstr aldaǵy jylytý maýsymyna daıyndyq, jylý kózderin jańǵyrtý, sondaı-aq jylýmen qamtý turaqtylyǵyn qamtamasyz etý baǵytynda atqarylyp jatqan sharalar jóninde baıandady. Atap aıtqanda, Topar MAES-inde jańa týrboagregat iske qosyldy, al Qaraǵandydaǵy JEO-3 bazasynda jańa energobloktyń qurylysy bastaldy.
— 2025 jyly oblysta jylý jelilerin jańǵyrtý men gazdandyrýǵa aýqymdy ınvestıtsııalar tartý josparlanyp otyr. Qaraǵandy men Temirtaý qalalarynda tórt iri joba — jylý magıstralin jáne ishki jylý jelilerin qaıta jańǵyrtý kózdelgen, — dep jazdy vedomstvodan.
Óńirdi gazdandyrý máselesine de erekshe kóńil bólinýde. Qazirgi tańda aımaqta 24 iske qosý kesheni júzege asyrylýda, onyń 16-sy — Qaraǵandyda, 8-i Temirtaýda. Bul jobalar 35 myńnan astam úıdi gazben qamtamasyz etýge múmkindik beredi. Sonymen qatar Qaraǵandy men Temirtaýda gaz taratý jelileriniń, Shahtınsk qalasynda gaz qubyry men avtomattandyrylǵan gaz taratý stansasynyń qurylysy júrgizilip jatyr.
Kezdesý barysynda vıtse-mınıstr turǵyndardyń elektr jáne jylýmen qamtý, tarıf saıasatyna qatysty suraqtaryna jaýap berdi.
Sapar aıasynda Suńǵat Esimhanov Temirtaýdaǵy birqatar strategııalyq mańyzdy nysandardy aralady. Qarmet» AQ JEO-2 stansasynda № 7 qazandyq jumysyn baqylap, № 3 jylý magıstralin qaıta jańartý jumystarynyń barysymen tanysty. Ol qurylys jumystarynyń sapasy men merzimin saqtaý qajettigin atap ótti. Sebebi bul jobalar qalany jylýmen turaqty ári senimdi qamtýda mańyzdy ról atqarady.
Buǵan deıin habarlanǵandaı, Qaraǵandy oblysynda Topar MAES-inde jańa týrbına iske qosyldy.