Qaraǵandy oblysynda 3 jyl boıy jasyrynǵan alaıaq bet-álpetti taný júıesi arqyly ustaldy
ASTANA. KAZINFORM — Asa iri kólemde alaıaqtyq jasady degen kúdikpen úsh jyldan beri izdeýde júrgen Qaraǵandy turǵyny Almatyda zamanaýı beınebaqylaý júıesiniń kómegimen qolǵa tústi.
37 jastaǵy er adam 44 mln teńgeden astam shyǵyn keltirgen alaıaqtyq isi boıynsha izdeýde bolǵan. Sot sheshimimen probatsııalyq baqylaýda bolǵan ol 2023 jyly turǵylyqty jerin óz betinshe tastap, belgisiz baǵytqa ketken.
Quqyq qorǵaý organdary ony izdeýdi toqtatpaǵan. Jedel aqparat nátıjesinde kúdiktiniń Almatyda júrgeni anyqtalǵan.
Alaıda ony ustaý úshin arnaıy operatsııa júrgizýdiń qajeti bolmady. Kúdiktiniń joly sýpermarketterdiń birinde beınebaqylaý kamerasyna túsken sátte kesildi.
Qalalyq beınebaqylaý júıesindegi bet-álpetti taný tehnologııasy er adamnyń júzin izdeýdegi tulǵalar bazasymen salystyryp, onyń jeke basyn anyqtaǵan.
Júıeden túsken belgi boıynsha polıtsııa qyzmetkerleri kúdiktini dereý ustap, jeke basyn rastaǵannan keıin Qaraǵandy oblysy polıtsııasynyń qujattaryna sáıkes týǵan qalasyna jetkizdi.
Qazir er adam qamaýda otyr. Oǵan qatysty sot sheshimi shyǵady. Sondaı-aq buryn taǵaıyndalǵan probatsııalyq baqylaý úkiminiń kúshin joıý jáne jazanyń ótelmegen bóligin bas bostandyǵynan aıyrý túrinde óteý máselesi qaralady.
Eske salaıyq, buǵan deıin Almatyda kýrer zeınetker bergen aqshany alaıaqtarǵa aparmaı qoıǵanyn jazǵan edik.
