Qaraǵandy oblysynda 3 mlrd teńgeden astam memlekettik satyp alý toqtatyldy
ASTANA. KAZINFORM — Qaraǵandy oblysynyń Qarqaraly aýdanynyń prokýratýrasy 558 mln teńgeden astam somaǵa bıýdjet zańnamasynyń buzylýyna jol bermedi.
Qarqaraly aýdanynyń prokýratýrasy 558 481 373 teńge somasyndaǵy bıýdjet qarajatynyń negizsiz jumsalýyna jolbermedi.
Aýdan prokýratýrasy 2026–2028 jyldarǵa arnalǵan aýdandyq bıýdjetti bekitý kezinde bıýdjet zańnamasynyń saqtalýyna júrgizgen tekserý nátıjesinde 210 000 000 teńge kóleminde bıýdjetti negizsiz josparlaý faktisin anyqtady.
Aýdan prokýratýrasy Qazaqstan Respýblıkasy Bıýdjet kodeksiniń 91-baby talaptarynyń buzylýy boıynsha qadaǵalaý aktisin engizdi. Atap aıtqanda, smetalyq esepter men jobalyq-smetalyq qujattamaǵa engizilgen túzetýlerdiń baǵa qalyptastyrýyn rastaıtyn qujattardyń bolmaýy, qarjylandyrylatyn nysannyń bıýdjet ákimshisiniń balansynda bolmaýy, sondaı-aq áleýmettik mańyzy joq marshrýtty sýbsıdııalaý faktileri anyqtaldy.
Sonymen qatar, memlekettik satyp alý portalyn monıtorıngileý nátıjesinde «Memlekettik satyp alý týraly» Qazaqstan Respýblıkasy Zańynyń 5-babynyń talaptarynyń buzylý faktileri anyqtaldy. Atap aıtqanda, bıýdjet qarajatyn ońtaıly ári tıimdi jumsaý qaǵıdattarynyń saqtalmaýy jáne áleýetti ónim berýshilerge teń múmkindikter berilmeýi oryn alǵan.
Aýdan prokýratýrasynyń narazylyǵy boıynsha jalpy somasy 3 090 000 000 teńge bolatyn memlekettik satyp alýlardyń kúshi joıylyp, bıýdjetke qarajat qaıtaryldy jáne 348 481 373 teńgeniń negizsiz paıdalanylýyna jol berilmedi.
Qadaǵalaý aktisin qaraý qorytyndysy boıynsha bıýdjet qarajaty áleýmettik mańyzy bar jobalarǵa qaıta bólindi. Sondaı-aq 31 laýazymdy tulǵa tártiptik jaýapkershilikke tartyldy, olardyń qatarynda aýdan ákiminiń orynbasary da bar.
Aıta ketelik Atyraý prokýratýrasy memleketke mıllıondaǵan aktıvterdi qaıtarǵan edi.
