Qaraǵandy oblysynda 252 mln teńgeden astam alıment bereshegi óteldi
ASTANA. KAZINFORM — Qaraǵandy oblysynda prokýrorlyq qadaǵalaý sharalary nátıjesinde jyl basynan beri alıment boıynsha 252,4 mln teńge bereshek ótelip, júzdegen balanyń alıment alý quqyǵy qalpyna keltirildi. Sot sheshimderin oryndaýdan jaltarǵan boryshkerler men zań talaptaryn buzǵan sot oryndaýshylary da jaýapkershilikke tartyldy. Bul týraly Bas prokýratýra málim etti.
Jyl basynan beri 50 prokýrorlyq qadaǵalaý aktileri qaralǵan. Nátıjesinde memleket kirisine 323,9 mln teńge óndirilgen.
Prokýrorlyq qadaǵalaý aktileri boıynsha anyqtalǵan zańnamany buzǵany úshin 58 sot oryndaýshysy tártiptik jaýaptylyqqa tartyldy, sot sheshimderin oryndaýdan jaltarǵany úshin 41 boryshker ákimshilik jaýaptylyqqa tartyldy.
— Prokýratýra organdary balany ustaýǵa arnalǵan qarajatty tóleýden qasaqana jaltarǵan adamdarǵa qatysty qylmystyq-quqyqtyq sıpattaǵy sharalar qabyldaýda. Aǵymdaǵy jyly Qazaqstan Respýblıkasy Qylmystyq kodeksiniń 139-baby boıynsha 23 sotqa deıingi tergep-tekserý tirkelip, tórt boryshker qylmystyq jaýaptylyqqa tartyldy, — delingen habarlamada.
Máselen, óńir turǵyny «Z» úsh aıdan astam ýaqyt boıy kámeletke tolmaǵan balalaryna alıment tóleýden jaltaryp, 2,7 mln teńge kóleminde bereshek jınaǵan. Sot úkimimen oǵan probatsııalyq baqylaý belgilene otyryp jáne jylyna 100 saǵat merzimge májbúrli eńbekke tarta otyryp, bir jyl bas bostandyǵyn shekteý túrinde jaza taǵaıyndaldy.
Qaraǵandy oblysynyń prokýratýrasy ata-analardyń óz balalaryn asyraý mindeti tek moraldyq paryz ǵana emes, sonymen qatar zańtalaby ekenin eske saldy.
Sot sheshimderin oryndaýdan jaltarý zańda belgilengen ákimshilik jáne qylmystyq jaýaptylyqqa ákep soǵady. Sot aktileriniń oryndalýyn qamtamasyz etý jáne balalardyń quqyqtaryn qorǵaý jónindegi jumys jalǵasýda jáne oblys prokýratýrasynyń turaqty baqylaýynda.
Eske sala keteıik, Astanada alıment tólemegen boryshker 5 mln teńge qaryzben qaıta sottaldy.
