Qaraǵandy oblysynda 235 synyp onlaın oqýǵa aýystyryldy

QARAǴANDY. KAZINFORM — Óńirde JRVI men tumaýdyń taralýy ósip, mektepterde kúsheıtilgen epıdemıologııalyq rejım engizildi. Infektsııanyń odan ári jaıylýyna jol bermeý úshin birqatar synyptar ýaqytsha qashyqtan oqytý formatyna aýystyryldy.

Qaraǵandy oblysynda tumaý men ózge de jedel respıratorlyq vırýstyq ınfektsııalardyń kóbeıýine baılanysty sanıtarlyq-profılaktıkalyq sharalar kúsheıtildi. Barlyq áreketter QR Bas memlekettik sanıtarııalyq dárigeriniń qaýlysyna sáıkes júrgiziledi.

Qujat maýsymdyq ınfektsııalardyń órshýine jol bermeýge baǵyttalǵan keshendi talaptardy qamtıdy. 15 qyrkúıekten beri elde tumaýǵa qarsy vaktsınatsııa bastaldy. Barlyq medıtsına uıymdarynda kireberiste súzgi-posttar jumys istep tur, al 1 qazannan bastap medıtsına qyzmetkerleri úshin maska rejımi engizilgen. Júkti áıelder men bir jasqa deıingi balalar JRVI nemese tumaý belgileri bolǵan jaǵdaıda úı jaǵdaıynda kezekten tys qyzmet kórsetiledi. Balabaqshalarda kún saıyn tańerteńgi súzgi ótkizilip, aýrý belgileri bar balalar úılerine qaıtarylady.

Mektepter úshin de arnaıy sharalar qarastyrylǵan. Eger bir synypta ınkýbatsııalyq kezeń ishinde 20–30% oqýshy syrqattansa, kabınettik júıeden ýaqytsha bas tartý, on kún boıy jańa oqýshylardy qabyldaýdy toqtatý jáne terige arnalǵan antıseptık bar sanıtaızerler ornatý usynylady.

Al syrqattanǵandar úlesi 30% jáne odan joǵary bolsa, jaǵdaı turaqtanǵanǵa deıin synyp tolyqtaı qashyqtan oqytý formatyna aýystyrylady.

Búgingi tańda Qaraǵandy oblysynda 54 mekteptegi 235 synyp onlaın oqýǵa jiberildi. Bılik ókilderi mundaı sharalar vırýs juqpasynyń taralýyn tejeýge jáne oqýshylardyń densaýlyǵyn qorǵaýǵa múmkindik beretinin atap ótti.

Buǵan deıin oblysta shamamen 30 synyptyń qashyqtan oqytý formatyna aýysqany habarlanǵan edi.