Qaraǵandy oblysynda 220-dan astam jergilikti jylý kózderi qys mezgiline daıyn

QARAǴANDY. KAZINFORM — Qaraǵandy oblysynda jylytý maýsymyna daıyndyq jalǵasyp jatyr. Jabdyq jóndelip, otyn satyp alý jumystary júrgizilip jatyr. Bul týraly oblys ákimdigindegi apparattyq keńeste energetıka jáne TKSh basqarmasynyń basshysy Tilektes Dosaev málimdedi.

– Daıyndyq boıynsha is-sharalardy oryndaý búgingi kúni 35% josparmen 36,2% quraıdy. 224 jergilikti jylý kózderiniń, 900 shaqyrymǵa jýyq ınjenerlik jelilerdiń, 418 áleýmettik mádenı turmystyq nysandardyń jáne 2044 kópqabatty turǵyn úılerdiń daıyndyǵy qamtamasyz etildi, – dep habarlady ol.

Oblystyń energııa kózderinde negizgi jáne qosalqy jabdyqtardy jóndeý jalǵasyp otyr. Kómir satyp alý jáne ony kezeń-kezeńmen jóneltý jumystary bastaldy.

Qaraǵandy oblysynyń ákimi áleýmettik mańyzy bar nysandardyń aldaǵy qysqa daıyndyǵyn jáne elektr stantsııalarynda jóndeý jumystaryn turaqty baqylaýda ustaýdy tapsyrdy.

– Aldaǵy jylytý maýsymyna ýaqtyly jáne sapaly daıyndyq – meniń apta saıynǵy baqylaýymda qalatyn basty másele. Búginde barlyq qajetti qujattar qabyldanyp, jaýapty tulǵalar taǵaıyndaldy. Jóndeý jumystarynyń kestesin qatań saqtaý qajet. Energetıka basqarmasy men aýdan ákimderine jylý berý maýsymyna sapaly daıyndyqty qamtamasyz etýdi, kómirdi ýaqtyly satyp alý boıynsha jumystardy júrgizýdi jáne sapany baqylaýdy tapsyramyn. Kómirdi aldyn ala daıyndaý qajettiligi týraly halyqpen túsindirý jumystaryn júrgizý qajet – dep atap ótti Ermaǵanbet Bólekpaev.