Qaraǵandy oblysynda 150 jyl buryn salynǵan mazar qalpyna keltirilip jatyr
QARAǴANDY. KAZINFORM – Qaraǵandy oblysynda Igilik bı mazaryn qaıta qalpyna keltirý jumystary bastaldy. Tarıhı eskertkishti restavratsııalaýǵa kásibı mamandar jumyldyrylǵan.
Qaraǵandy oblysynyń Saran qalasynda, Baıtam kentiniń mańynda Igilik bı mazary ornalasqan. Ol shamamen 1875-1880 jyldary turǵyzylǵan. Bul óńirdegi qasıetti oryndardyń biri. Ýaqyt óte kele qurylys tabıǵı faktorlardyń áserinen zardap shegip, shógip qalǵan. Qazir eskertkishti bolashaq urpaq úshin saqtap qalý maqsatynda qalypqa keltirý jumystary bastaldy.
Jumystardy júrgizý kezindegi mindetti talap — tarıhı kelbetti saqtaý. Mazar kúmbezi bar segiz burysh pishindes óńdelmegen kirpishten jasalǵan. Ol 2000 jyly respýblıkalyq mańyzy bar tarıh jáne sáýlet eskertkishi bolyp tanylyp, memlekettik qorǵaýǵa alynǵan. Qurylystyń avtorlary men qurylysshylary týraly málimetter saqtalmaǵan.
Igilik bı (Ótepov) — Qareke-Altaı bolysynyń kórnekti qaıratkeri. XIX ǵasyrda bilim berýdi, kómir ónerkásibin damytýǵa jáne qazaq halqyn áleýmettik qoldaýǵa úles qosqan tulǵa. Igilik bıdiń beınesi Ǵabıt Músirepovtyń «Oıanǵan ólke» romanynda beınelengen.
Osyǵan deıin Qaraǵandy oblysyndaǵy Nura aýdanynda arheologtar orta ǵasyr dáýirine jatatyn, búginge deıin buzylmaı saqtalǵan bala zıratyn anyqtaǵany jaıly habarlaǵan bolatynbyz. Biregeı olja E.A. Bóketov atyndaǵy Qaraǵandy zertteý ýnıversıtetiniń ekspedıtsııasy júrgizgen dalalyq zertteý kezinde tabylǵan.