Qaraǵandy oblysynda 120 kamera júrgizýshilerdiń telefon qoldanýyn tirkeı bastady
QARAǴANDY. KAZINFORM — Óńirde jol qozǵalysy erejelerin buzýshylyqtardy avtomatty túrde tirkeý múmkindigi keńeıtildi. Endi júrgizýshilerge kólik jyldamdyǵyna ǵana emes, avtokólik salonynda bolyp jatqan jaǵdaıǵa da muqııat bolýǵa týra keledi.
Qyrkúıek aıynyń basynan bastap Qaraǵandy oblysyndaǵy 120 apparattyq-baǵdarlamalyq keshen kólik qozǵalysy kezinde júrgizýshilerdiń telfon jáne radıostantsııa paıdalanýyn, sondaı-aq júrgizýshiler men jolaýshylardyń qaýipsizdik beldigin taqpaýyn tirkeı bastady. Anyqtalǵan quqyq buzýshylyqtar boıynsha qaýlylar avtomatty túrde toltyrylady.
Buǵan deıin keshender negizinen jyldamdyq rejımin buzýdy tirkegen. Qazir óńirde 198 jyldamdyq ólshegish jumys isteıdi. Onyń 28-i — mobıldi, qalǵany — statsıonarlyq qurylǵylar.
Avtokólik basqarý kezinde telefon paıdalanǵany úshin QR ÁQBtK-niń 591-babyna sáıkes 5-ten 15 AEK-ke deıin (21 625-ten 64 875 teńgege deıin) aıyppul qarastyrylǵan. Qaýipsizdik beldigin paıdalaný talaptaryn, onyń ishinde jolaýshylar tarapynan saqtamaǵany úshin QR ÁQBtK-niń 593-babyna sáıkes 5-ten 10 AEK-ke deıin (21 625-ten 43 250 teńgege deıin) aıyppul salynady.
Qaraǵandy oblysynyń polıtsııa departamenti kólik júrgizý kezinde telefon paıdalaný jol-kólik oqıǵasyna ushyraý yqtımaldyǵyn edáýir arttyratynyn atap ótti. Vedomstvonyń málimetinshe, mundaı jaǵdaıda apat qaýpi tórt ese artady. Al Qaraǵandy qalasynda jol-kólik oqıǵalarynyń shamamen árbir úshinshi jaǵdaıy júrgizýshilerdiń gadjetke alańdaýymen baılanysty.
Nazardyń birneshe sekýndqa bólinýiniń ózi aýyr zardaptarǵa ákelýi múmkin. Máselen, kólik saǵatyna 60 shaqyrym jyldamdyqpen kele jatqanda, bes sekýnd ishinde shamamen 100 metr jol júredi. Osy ýaqyt aralyǵynda júrgizýshiniń nazary jolǵa emes, basqa nársege aýyp ketýi múmkin.
Keshenderdiń taǵy bir jańa fýnktsııasy — qaýipsizdik beldigin taqpaǵandardy avtomatty túrde tirkeý. Polıtsııanyń málimetinshe, qaýipsizdik beldigin paıdalaný jol-kólik oqıǵasy kezinde qaza bolý qaýpin shamamen 50%-ǵa tómendetedi. Jyl basynan beri óńirde bolǵan jol-kólik oqıǵalarynan 550-den astam adam jaraqat alǵan, olardyń 100-den astamy apat kezinde qaýipsizdik beldigin taqpaǵan.
Polıtsııa júrgizýshilerdi tek óz qaýipsizdigin ǵana emes, jolaýshylardyń da jol qozǵalysy erejelerin saqtaýyn baqylaýǵa shaqyrady. Ásirese balalarǵa erekshe kóńil bólý qajet. Balany avtokólikte tasymaldaý kezinde tıisti balalardy ustap turatyn qurylǵyny paıdalanyp, ony qaýipsiz ári senimdi túrde bekitý kerek.
Jolǵa shyǵar aldynda júrgizýshilerge ózderi qaýipsizdik beldigin taǵyp, jolaýshylardyń beldigin taqqanyn tekserý, balalardyń avtokresloda durys ornalasýyn qadaǵalaý, telefondy alyp qoıyp, kólik júrgizý kezinde ony paıdalanbaý usynylady. Eger qońyraýǵa jaýap berý nemese gadjetti paıdalaný qajet bolsa, ruqsat etilgen jerde kólikti toqtatý kerek.
Polıtsııa departamenti kameralardyń fýnktsııalaryn keńeıtýdegi basty maqsat — quqyq buzýshylyqtardyń aldyn alý jáne joldardaǵy qaýipsizdikti arttyrý ekenin atap ótti.
Buǵan deıin Temirtaýda 1575 kamera arqyly táýlik boıy baqylaý júrgizetin ortalyq ashylǵanyn habarlaǵan bolatynbyz.
