Qaraǵandy oblysynda 10 jastaǵy balany tok soǵyp, jansaqtaý bólimine jetkizildi
QARAǴANDY.KAZINFORM - Qaraǵandy oblysynyń Dolınka kentinde 10 jastaǵy balany balalar alańynyń janynda ornalasqan elektr jetkizý jelisiniń tireginde tok soǵyp, jansaqtaý bólimine jetkizildi. Balanyń týystary qaýipsizdik sharalaryn kúsheıtip, qaýipti nysandy qorshaýdy talap etip otyr.
Dolınka kentinde 10 jastaǵy bala balalar oıyn alańynan birneshe metr jerde ornalasqan elektr jelisiniń tireginde joǵary kerneýli toktyń áserine ushyrap, aýyr jaraqat alǵan. Qazirgi ýaqytta ol jansaqtaý bóliminde jatyr.
Týystarynyń aıtýynsha, bala basqa dostarymen birge oınap júrgen kezde elektr baǵanyna órmelep shyqpaq bolǵan. Oqıǵa kýágerleriniń sózinshe, bala tirekke órmelep, belgili bir bıiktikke kóterilgen sátte tok soqqan. Ol elektr symdaryna qol tıgizbegen, alaıda aldyn ala málimet boıynsha joǵary kerneýli jeliniń elektr doǵasynyń áserine túsken.
Balalar tars etken dybysty estip, balanyń es-tússiz jerge qulaǵanyn kórgen. Alǵashqylardyń biri bolyp kómekke kórshisi júgirip kelip, dárigerler jetkenge deıin qoldan tynys aldyrý sharalaryn jasaǵan.
— Eger kómek sál keshikkende, qaıǵyly jaǵdaı bolýy múmkin edi, - deıdi balanyń ápkesi Anastasııa Rabıza.
Tok soǵýy men bıiktikten qulaý saldarynan bala jaraqattar alǵan.
Týystarynyń aıtýynsha, júregi, ókpesi, basy, omyrtqasy jáne ishki aǵzalary zaqymdanǵan. Qoldary men ıyǵynda aýyr kúıik izderi bar. Dárigerler otbasy múshelerine aǵzaǵa túsken júkteme ınfarkttan keıingi jaǵdaımen shamalas bolǵanyn túsindirgen.
Oblystyq kópsalaly balalar aýrýhanasynyń Balalar hırýrgııasy ortalyǵynyń jetekshisi Beıbit Berdibekov naýqastyń jaǵdaıy áli de aýyr ekenin aıtty.
— Qazirgi ýaqytta bala qarqyndy terapııa bóliminde jatyr. Jaǵdaıy aýyr bolǵanymen turaqty. Emdeý tolyq kólemde júrgizilip jatyr, - dedi ol.
Oqıǵadan keıin týystary elektr baǵanynyń mańynan balalar alańynan bastalatyn soqpaq joldy baıqaǵan. Olardyń pikirinshe, bul balalardyń qaýipti nysanǵa jıi jaqyndaıtynyn kórsetedi. Alaıda atalǵan aýmaqta eskertý belgileri de, qorshaýlar da joq.
Otbasy músheleri elektr jetkizý jelisiniń tiregi kún saıyn balalar oınaıtyn jerdiń janynda turmaýy tıis dep esepteıdi jáne qaýipsizdikti qamtamasyz etý úshin tıisti sharalar qabyldaýdy talap etip otyr.
Qaraǵandy oblysy Polıtsııa departamentiniń málimetinshe, jaraqat alý faktisi tirkelgen. Jınalǵan materıaldar Qaraǵandy oblysy boıynsha Atomdyq jáne energetıkalyq qadaǵalaý men baqylaý komıtetiniń aýmaqtyq departamentine joldanǵan. Tekserý qorytyndysy boıynsha qylmystyq quqyqbuzýshylyq belgileriniń bar-joǵy jóninde sheshim qabyldanady.
Qazirgi ýaqytta oqıǵanyń barlyq mán-jaıy anyqtalý ústinde.
Buǵan deıin Qaraǵandy oblysynda balasyn ıt talaǵan ana kinálilerge jaza qoldanýdy talap etkenin habarlaǵan bolatynbyz.
