10 myń tonna kartop pen kókónis saqtaıtyn qoımalar salynady
ASTANA. KAZINFORM — Qaraǵandy oblysynda aýyl sharýashylyǵy ónimderin saqtaýǵa arnalǵan eki jańa nysan iske qosylady. 2026–2027 jyldary paıdalanýǵa berilýi josparlanǵan qoımalardyń jalpy syıymdylyǵy 10 myń tonna bolady dep josparlanǵan. Bul týraly Aýyl sharýashylyǵy mınıstrldigi málim etti.
Aýyl sharýashylyǵy mınıstrligi aýyl sharýashylyǵy ónimderin saqtaý ınfraqurylymyn damytý, sýarmaly jerlerdiń kólemin ulǵaıtý jáne agroónerkásiptik keshendegi ınvestıtsııalyq belsendilikti qoldaý baǵytynda júıeli sharalar qabyldap keledi. Bul azyq-túlik qaýipsizdigin nyǵaıtý, otandyq óndiristiń turaqty ósýin qamtamasyz etý jáne ishki naryqty turaqty ónimmen qamtý úshin mańyzdy.
Qaraǵandy oblysynda aýyl sharýashylyǵy ónimderin saqtaý qýattary kezeń-kezeńimen keńeıtilip keledi. 2026–2027 jyldary óńirde jalpy syıymdylyǵy 10 myń tonna bolatyn eki jańa nysandy paıdalanýǵa berý josparlanǵan. Jobalardy iske asyrý ósirilgen ónimniń saqtalýyn qamtamasyz etýge, maýsymdyq shyǵyndardy azaıtýǵa jáne kókónis ónimderin jyl boıy ishki naryqqa birkelki jetkizýge múmkindik beredi.
— Qazirgi tańda oblysta saqtaý ınfraqurylymynyń edáýir bazasy qalyptasqan. Óńirde jalpy syıymdylyǵy 329 myń tonna bolatyn kartop saqtaýǵa arnalǵan 121 qoıma, sondaı-aq jalpy syıymdylyǵy 24 480 tonna bolatyn 20 astyq qoımasy jumys isteıdi, — delingen vedomstvonyń habarlamasynda.
Agrarshylar óz ınfraqurylymyn damytýǵa ınvestıtsııa salýdy jalǵastyrmaq.
Atap aıtqanda, «Dostyq-2009» seriktestigi syıymdylyǵy 6 myń tonna bolatyn zamanaýı kókónis qoımasynyń qurylysyn aıaqtap keledi. Nysandy bıyl paıdalanýǵa berý josparlanǵan.
Taǵy bir joba «ıÝbıleınoe» sharýashylyǵynda júzege asyrylýda. Munda bir mezgilde 4 myń tonna kartop saqtaýǵa arnalǵan qoıma salynýda. Qurylysty aıaqtap, nysandy keler jyly iske qosý mejelengen.
Osylaısha, eki jańa nysan paıdalanýǵa berilgennen keıin saqtaý qýattarynyń jalpy kólemi 10 myń tonnaǵa ulǵaıady. Bul agrarshylarǵa ónim qoryn tıimdi basqarýǵa, ónimniń shyǵynyn azaıtýǵa jáne ony maýsymaralyq kezeńde ótkizýge jol ashady.
Sonymen qatar óńir sharýashylyqtary óndiristik qýattaryn arttyryp, zamanaýı agrotehnologııalardy engizýde.
Máselen, Qaraǵandy aýyldyq okrýgindegi «Shyǵys» sharýashylyǵy buǵan deıin qýattylyǵy 1,5 myń tonna bolatyn astyq qoımasyn salǵan. Munda kartop, bıdaı jáne arpa ósiriledi.
Qazirgi ýaqytta sharýashylyq jańa sýarý júıesin ornatýdy josparlap otyr. Bul sý resýrstaryn tıimdi paıdalanyp, sýarmaly jerlerdiń kólemin ulǵaıtyp, aýyl sharýashylyǵy daqyldarynyń ónimdiligin arttyrady.
— Sýarmaly jerlerdiń kólemin ulǵaıtyp, óndiristiń tıimdiligin arttyrý úshin sýbsıdııalaý baǵdarlamasyna aldaǵy ýaqytta da qatysýdy josparlap otyrmyz. Memlekettik qoldaý osyndaı jobalardy iske asyrýǵa, sharýashylyqty jańǵyrtýǵa, zamanaýı tehnologııalardy engizýge jáne óndiriletin ónim kólemin arttyrýǵa múmkindik beredi. Bul ásirese óńirdiń azyq-túlik qaýipsizdigin nyǵaıtý úshin mańyzdy, — dedi «Shyǵys» sharýashylyǵynyń basshysy Shamıl Osın.
Budan bólek sharýashylyq mal baǵytyn da damytyp keledi.
Onyń aýmaǵynda 1 myń basqa arnalǵan iri qara mal fermasynyń qurylysy jalǵasýda. Jobaǵa salynatyn ınvestıtsııanyń jalpy kólemi 1,5 mlrd teńge.
Aýyl sharýashylyǵy mınıstrliginde ónimderdi saqtaý ınfraqurylymyn damytý agroónerkásiptik keshendi nyǵaıtýdyń mańyzdy baǵyttarynyń biri.
Jańa kókónis jáne kartop qoımalaryn salý ósirilgen ónimdi saqtap qana qoımaı, ony jyl boıy naryqqa birkelki jetkizýdi qamtamasyz etedi. Bul maýsymdyq tapshylyqty azaıtýǵa, baǵa aýytqýlaryn turaqtandyrýǵa jáne otandyq aýyl sharýashylyǵy ónimderiniń halyq úshin qoljetimdiligin arttyrýǵa barynsha yqpal etedi.
Qazaqstanda zamanaýı kókónis qoımalarynyń jetispeýshiligi uzaq ýaqyt boıy maýsymdyq kókónis tapshylyǵy men baǵanyń kúrt qubylýy sebepteriniń biri edi. Memleket basshysy Qasym-Jomart Toqaevtyń tapsyrmasy boıynsha elde kókónis saqtaý nysandaryn salý jáne jańǵyrtý jónindegi aýqymdy baǵdarlama júzege asyrylyp, olardyń saqtaý qýaty eseptik qajettilik deńgeıine jetkizildi. Infraqurylymnyń damýy azyq-túlik qaýipsizdigi men ishki naryqtaǵy ahýalǵa qalaı yqpal etti? Tolyǵyraq kenin Kazinform sarapshysynyń meterıalynan oqyńyz.
