Qaraǵandy oblysynan shyqqan tazy Qazaqstannyń maqtanyshyna aınaldy
QARAǴANDY. KAZINFORM – Qaraǵandy oblysy Osakarov aýdanyndaǵy 1 jasar Taıǵan Qazaqstan men TMD elderindegi kórmelerde tóreshilerdiń joǵary baǵasyn alyp júr. Ol birneshe elde chempıondyq tıtýldardy jeńip, elimizdegi tanymal ári úzdik ıtterdiń birine aınaldy.
Taıǵannyń ıesi Sergeı Dolgolaptev Osakarov aýdanyndaǵy Okolnoe aýylynda turady. Ol – Qaraǵandy orman-ańshylyq sharýashylyǵynyń ańshysy.
Sergeı men onyń áıeli Vıktorııa burynnan ańshy ıtterdi, onyń ishinde tazy tuqymyn ósirýdi qolǵa alǵan. Biraq bir jyl buryn ol Qyrǵyzstannan ulttyq qazyna sanalatyn taıǵan kúshigin ákelýdi uıǵardy.
Qyrǵyz tazysy nemese taıǵan – kúshimen, tózimdiligimen jáne adaldyǵymen tanymal ejelgi tuqymdardyń biri. Bul ıtterdi Qyrǵyzstannan tys jerlerge shyǵarýǵa buryn tyıym salynǵan. Onyń kúshikteri tek qurmetti qonaqtarǵa ǵana berilgen.
Kúshikke Qazaqstan astanasynyń burynǵy ataýy Nursultan esimi berildi. Keıin ol túrli baıqaýlarda úzdik atana bastady. Aldymen 2025 jyldyń aqpan aıynda Qaraǵandydaǵy alǵashqy shoýynda tóreshilerdi tánti etti. Tamyz aıynda «Qazaqstannyń jas chempıony» boldy. Odan keıin Qorǵan qalasynda «Federatsııa chempıony» jáne «Reseıdiń jas chempıony» ataǵyn jeńip aldy. Qyrkúıek aıynda «Qyrǵyzstan chempıony», «TMD jeńimpazy», keıinirek «Ózbekstannyń jas chempıony» jáne taǵy da «TMD jeńimpazy» ataǵyn ıelendi. Astanada ótken kórmede ol «Úzdik tuqym» ataǵyna ıe boldy.
Bul jetistikterinen keıin Qyrǵyzstannyń kınologtary oǵan qyzyǵýshylyq tanyta bastady. Olar Nursultannyń asyl tuqymdy qasıetterin atap ótip, tuqymdy saqtaý jáne qalpyna keltirý baǵdarlamasyna engizýdi qarastyryp jatyr.
– Bizdiń ıtimiz halyqaralyq áriptesterimizdiń nazaryn ózine aýdarady. Óıtkeni onda taıǵannyń erekshe qasıetteri bar. Jaýapkershiliktiń budan da artqanyn túsinemiz jáne oǵan tıisti kútim men oqytýdy qamtamasyz etýge tyrysamyz, - deıdi ıt ıesi Sergeı Dolgolaptev.
Osakarov aýdany ákimdiginiń habarlaýynsha, taıǵannyń jetistigi tek ıeleriniń ǵana emes, búkil Qaraǵandy oblysynyń abyroıyn asqaqtatty.