Qaraǵandy oblysyna jyl basynan beri 680 mlrd teńge ınvestıtsııa quıyldy

ASTANA. KAZINFORM — Jyl basynan beri Qaraǵandy oblysynyń ekonomıkasyna 679,1 mlrd teńge ınvestıtsııa quıylǵan. Bul týraly óńir basshysy Ermaǵanbet Bólekpaev málimdedi.

— Jyl basynan beri oblystyń ekonomıkasyna 679,1 mlrd teńge ınvestıtsııa quıyldy. Bul ótken jyldaǵy osy kezeńimen salystyrǵanda 14,6%-ǵa artyq. Oblys kartasynda eki jańa kásiporyn paıda boldy. Jyl sońyna 200 mlrd teńgeden astam ınvestıtsııa tartylǵan taǵy 8 jobany iske qosamyz. Bul 2600 jańa jumys ornyn qurýǵa múmkindik beredi. Іri jobalardyń qatarynda mys jáne ferrosılıtsıı óndiretin zaýyttar bar, — dedi Ermaǵanbet Bólekpaev.

Ákimniń aıtýynsha, ónerkásip óndirisiniń kólemi 2,8 trln teńgeden asty. Negizgi bóligi óńdeý ónerkásibine tıesili. Bul 2,2 trln teńge.

Oblys basshysy Qarmet kompanııasynyń qyzmetine jeke toqtaldy.

— Ózderińiz biletindeı, byltyr Memleket basshysynyń tapsyrmasymen óńirdegi eń iri Qarmet kásipornynda ınvestor aýysyp, alyp kásiporynda qaıta jańǵyrý bastaldy. Metallýrgııalyq kombınatta shoıyn, bolat jáne jalpaq prokat óndirisi artty. Jańa ınvestor kelgen kezde segiz shahtanyń úsheýi ǵana jumys istep turǵan edi. Qazir jeti shahta jumys istep tur. Uńǵyma kenjarlarynyń sany 11-den 45-ke deıin ulǵaıtyldy. Bul bolashaqqa arnalǵan negiz, ol shahtalardyń kóp jyldar boıy jumys isteýin qamtamasyz etedi, — dep atap ótti Ermaǵanbet Bólekpaev.

Kenshilerdiń qaýipsizdigi úshin izdeý jáne pozıtsııalaý júıesi engizildi. Qazir bul júıe «Qazaqstan» jáne «Kúzembaev» atyndaǵy eki shahtada jumys isteıdi. Kelesi jyly barlyq shahtalar qamtylmaqshy.

Aıta keteıik, Qaraǵandy oblysynda 1 myń shaqyrymnan astam jol jóndeldi.

Sondaı-aq, oblys ákimi Saranda jańadan salynǵan jylý qazandyǵy nege tolyq jumys istemeı turǵanyn túsindirgen edi.