Qaraǵandy oblysyn 2032 jylǵa deıin qandaı ózgerister kútip tur
ASTANA. KAZINFORM — Qasym-Jomart Toqaevqa Qaraǵandy oblysynyń áleýmettik-ekonomıkalyq damýy jóninde málimet berildi, dep habarlaıdy Aqordanyń baspasóz qyzmeti.
Memleket basshysyna Qaraǵandy oblysynyń negizgi áleýmettik-ekonomıkalyq damý kórsetkishteri, ınvestıtsııalyq jobalardyń júzege asyrylýy jáne óńirdi odan ári jańǵyrtý jospary týraly aqparat usynyldy.
Toǵyz aıdyń qorytyndysy boıynsha oblys ekonomıkasy 2,9 paıyzǵa artyp, ónerkásip óndirisi 4,9 paıyzǵa ulǵaıdy.
Aıtarlyqtaı qarqyn mashına jasaý salasynda baıqaldy, ósim – 26,2 paıyz.
Óńirdiń 2032 jylǵa deıingi ınvestıtsııalyq portfeli jalpy quny 7 trıllıon teńgeni quraıtyn 186 jobadan turady. Ony iske asyrý 36 myń jumys ornyn ashýǵa múmkindik beredi.
Jańa óndiris oryndaryn qurýǵa, shıkizatty qaıta óńdeýge, mıneral-shıkizat bazasyn nyǵaıtýǵa, sondaı-aq otandyq jáne sheteldik ınvestorlardy tartýǵa erekshe nazar aýdarylyp otyr.
Budan bólek, Prezıdentke agroónerkásip kesheni men turǵyn úı qurylysyn ilgeriletý, áleýmettik ınfraqurylymdy jańǵyrtý jumystary jóninde baıandaldy.
Sońǵy úsh jylda Qaraǵandy oblysynda aýyldarǵa arnalǵan 92 densaýlyq saqtaý nysany men 13 mektep salynyp, bilim berý mekemelerin jańartý jumystary jalǵasyp jatyr.
Sport, mádenıet, energetıka jáne turǵyn úı-kommýnaldyq sharýashylyǵy baǵyttaryndaǵy jobalar qolǵa alyndy.
«Taza Qazaqstan» baǵdarlamasy aıasynda eldi mekender abattandyrylyp, jańa qoǵamdyq keńistikter men ekosaıabaqtar boı kóterýde.
Boljamǵa sáıkes, jyl qorytyndysy boıynsha oblys ekonomıkasy 4 paıyzǵa ósedi.
Ónerkásip áleýetin keńeıtý, ınvestıtsııalyq jobalardy iske asyrý jáne halyqtyń ómir súrý sapasyn arttyrý arqyly óńirdi odan ári órkendetý jumystary jalǵasa beredi.
Buǵan deıin Prezıdent Qarmet mıllıardtaǵan shyǵynnan arylyp, taza paıdaǵa shyqqanyn aıtty.
