Qaraǵandy oblysy joldarynda qysqy qaýipsizdik sharalary kúsheıtildi
QARAǴANDY. KAZINFORM – Qaraǵandy oblysynda avtojoldardy qys mezgiline daıyndaý jumystary qarqyndy júrip jatyr.
Merzimdi jumystar aıasynda óńirdegi joldarǵa jańa úlgidegi qar tosqaýyl torlary ornatylýda. Bul júıe kóktaıǵaq pen boran kezinde kólik qozǵalysynyń qaýipsizdigin qamtamasyz etýge baǵyttalǵan. Pılottyq joba retinde Saryarqa áýejaıyna aparatyn jolda bıiktigi 5 metrge jýyq jáne uzyndyǵy 1,2 shaqyrym bolatyn kompozıtti qorshaýlar ornatyldy. Qys boıy olardyń tıimdiligi baqylanyp, oń nátıje kórsetse, mundaı tosqaýyldar ózge baǵyttarda da ornatylady.
Aımaqtyń jol qyzmetteri tolyqtaı qysqy rejımge kóshken: táýlik boıy kezekshilik atqaratyn arnaıy tehnıka — qar tazalaıtyn kólikter, avtogreıderler, shnek-rotorlar jáne ámbebap jol mashınalary daıyn tur. Sonymen qatar 2,6 myń tonnadan astam kóktaıǵaqqa qarsy materıal qory jasaqtalǵan, jylytý pýnkteri men reagentter qoımalary ázirlengen. Joldardyń jaı-kúıi týraly aqparattar jedel jarııalanyp otyrady.
Budan bólek, bıyl oblys aýmaǵynda 630 shaqyrymnan astam jol jańartyldy. Qaraǵandy – Balqash baǵytyndaǵy ýchaske qaıta jóndeldi, sondaı-aq Nura – Osakarovka, Jartas – Dolınka jáne Úshtóbe – Qurylys baǵyttarynda jumystar jalǵasýda. Saran – Shahtınsk jolynda úsh qabat asfalt tóselip, kóliktiń qozǵalys ústindegi júktemesin avtomatty túrde ólsheıtin júıe ornatyldy. Bul shara jol jabynynyń qyzmet merzimin ulǵaıtýǵa múmkindik beredi.
Sonymen qatar, Nura ózeni arqyly ótetin kópirdiń rekonstrýktsııasy aıaqtalyp, Sherýbaı-Nura jáne Esil ózenderi ústindegi ótkelderde jumys júrgizilýde. «Aýyl – El besigi» jobasy aıasynda 21 eldi mekende 84 shaqyrym ishki jol jóndeldi.
Bıylǵy jumystardyń basty maqsaty – joldardyń tózimdiligin arttyrý jáne aýyr kólikterge eseptelgen zamanaýı ınfraqurylym qalyptastyrý. 2026 jyly taǵy 95 shaqyrym joldy jóndeý josparlanǵan, onyń ishinde Aqshataý – Aǵadyr – Ortaý baǵyty jáne jańa salmaqtyq baqylaý keshenderi ornatý da qarastyrylǵan.
Aıta keteıik, Qaraǵandy oblysynda taǵy bir jol jabylǵany habarlandy.