Qaraǵandy oblysy jylytý maýsymyna daıyn ba
QARAǴANDY. KAZINFORM – Jylytý maýsymynyń bastalýyna sanaýly kúnder qaldy. Qazir Qaraǵandy oblysy úshin eń jaýapty kezeń – qazandyqtar, jylý jelileri men turǵyn úılerdiń alǵashqy sýyqqa qanshalyqty daıyn ekenin pysyqtaý.
Qaǵaz júzinde daıyndyq deńgeıi 100 paıyzǵa jýyqtaǵanymen, keıbir jóndeý jumystary men otyn qoryn qalyptastyrý áli júrip jatyr.
Qaraǵandy oblysynyń energetıka jáne turǵyn úı-kommýnaldyq sharýashylyq basqarmasynyń málimetinshe, óńirdegi nysandardyń jylytý maýsymyna daıyndyq deńgeıi 99,6 paıyzdy quraıdy.
Bıyl kommýnaldyq ınfraqurylymdy jóndeýge jáne jylytý maýsymyna daıyndaýǵa barlyq qarjylandyrý kózderinen 196,4 mlrd teńge baǵyttalǵan. Bul ótken jylmen salystyrǵanda shamamen 44 paıyzǵa kóp. Salystyrý úshin, 2025 jyly osy maqsattarǵa 136,6 mlrd teńge qarastyrylǵan.
Qarajattyń negizgi bóligi energetıkalyq nysandardy, jergilikti jylý kózderin, jylý, sý qubyry jáne káriz jelilerin, sondaı-aq elektr jelileri men qosalqy stantsııalardy jáne gazben jabdyqtaý nysandaryn daıyndaýǵa jumsaldy.
Oblysta 602 jergilikti jylý kózi daıyndaldy. Onyń ishinde 45 qazandyq jáne 557 avtonomdy jylytý júıesi bar. Sonymen qatar 1,3 myń shaqyrymnan astam ınjenerlik jeli, 532 elektr qosalqy stantsııasy, áleýmettik salanyń 1116 nysany jáne 6 myńnan astam kópqabatty turǵyn úı jylytý maýsymyna ázirlendi.
Alaıda óńir turǵyndary úshin jylý jelileriniń jaı-kúıi eń ózekti máselelerdiń biri bolyp otyr. Bıyl Qaraǵandy, Temirtaý, Shahtınsk qalalarynda jáne Abaı aýdanynda jylý jelilerin qaıta jańartý men jóndeý jumystary júrgizilip jatyr. Al Balqash, Prıozersk qalalary men oblystyń birqatar aýdanynda ortasha jóndeý jumystary qolǵa alynǵan.
Jalpy quny 28,7 mlrd teńge bolatyn segiz joba júzege asyrylý ústinde. Olar 12,3 shaqyrym jylý jelisin qaıta jańǵyrtýdy kózdeıdi. Onyń tórteýi «Energetıkalyq jáne kommýnaldyq sektorlardy jańǵyrtý» ulttyq jobasy aıasynda iske asyrylyp jatyr. Bul jobalarǵa 21,8 mlrd teńge bólinip, 8,4 shaqyrym jelini jańartý josparlanǵan.
Atalǵan jobalar boıynsha montaj jumystary tolyq aıaqtaldy. Qazir jumys brıgadalary aýmaqtardy qalpyna keltirip, abattandyrý jumystaryn júrgizip jatyr.
Al energetıkalyq nysandardyń ózinde jóndeý naýqany áli jalǵasýda. Oblystaǵy jeti stantsııada 37 qazandyq pen 27 týrbınany jóndeý josparlanǵan. Búginde 24 qazandyq pen 17 týrbınadaǵy jumystar aıaqtaldy. Qazir 10 qazandyq pen bes týrbına jóndelýde.
Turǵyndar úshin taǵy bir mańyzdy másele – aýa temperatýrasy nólden tómendegen kezde otyn qory jetkilikti bola ma degen suraq.
Barlyq energetıkalyq stantsııa kómir jetkizý boıynsha kelisimshart jasasty. Aldaǵy jylytý maýsymynda 6,7 mln tonnadan astam otyn jetkizý josparlanyp otyr.
Halyqqa, bıýdjettik uıymdarǵa jáne kommýnaldyq-turmystyq qajettilikterge arnalǵan kómir qory da jeke qalyptastyrylýda. Qazirgi ýaqytta 531,7 myń tonna kómir daıyndalǵan. Bul qajetti kólemniń 49,8 paıyzy.
Sonymen qatar kommýnaldyq-turmystyq qajettilikter úshin kómir qory qajettiliktiń 81,2 paıyzyna jetse, halyq úshin bul kórsetkish ázirge 39,6 paıyzdy ǵana quraıdy. 2026–2027 jyldardaǵy jylytý maýsymyna oblysqa shamamen 1,07 mln tonna kómir qajet. Onyń 803,8 myń tonnasy halyqqa arnalǵan.
Dál osy kórsetkish ázirge alańdatarlyq deńgeıde. Turǵyndarǵa qajetti kómir kólemin tolyq jınaqtaýǵa áli de biraz ýaqyt kerek. Sondyqtan otyn jetkizý máselesi erekshe baqylaýda.
Soǵan qaramastan, óńirde jylytý maýsymyn bastaýǵa aıtarlyqtaı kedergilerdiń joqtǵy aıtyldy. Qalǵan jumystardy jaqyn arada aıaqtaý josparlanǵan. Jylytý maýsymyn 1–15 qazan aralyǵynda bastaý kózdelip otyr. Naqty merzim aýa raıyna jáne oblystyń ár óńirindegi jaǵdaıǵa baılanysty belgilenedi.
Buǵan deıin Astanada jylý berý maýsymyna daıyndyq júrip jatqany habarlanǵan bolatyn.
