Qaraǵandy oblysy jylytý maýsymyna daıyn ba?
Aldaǵy jylytý maýsymynda Temirtaý, Saran jáne Qaraǵandy páterlerinde jylý bola ma? Bul saýalǵa Qaraǵandy oblysynyń ákimi brıfıng barysynda jaýap berdi, dep habarlaıdy Kazinform.
Qaraǵandy oblysynyń ákimi Temirtaýdaǵy jylytý maýsymynyń ótýin erekshe baqylaýda ustaıtynyn aıtty. Ýaqytyly áreket etý úshin óńirde barlyq jylý kózderiniń jumysyn baqylaıtyn jedel shtab quryldy.
«ArselorMıttal Temirtaý» JEO-2 bizdiń talabymyz boıynsha daıyndyq pasportyn alǵan joq. Olar 4-shi jáne 5-shi qazandyqtardaǵy jóndeý jumystarynyń merzimin sozyp aldy. Biz apta saıyn sol jerge baryp, energııa baqylaýshy organdarmen birge jaǵdaıdy qadaǵalap otyramyz. Búgingi tańda stantsııa shtattyq rejımde jumys isteýde. Kómir qory jetkilikti — 20 kúnnen astam ýaqytqa eseptelgen. Jeltoqsan aıynda osy eki qazandyqty jóndeý jumystary aıaqtalýy tıis», — dedi óńir basshysy.
Oblys ákimi sondaı-aq Temirtaý qalasynyń basshylyǵyna oramishilik jylý jelileri boıynsha úsh jyldyq jospar ázirleýdi tapsyrdy.
«Oramishilik jeliler tozǵan, biz ol jaıly bilemiz. Sondyqtan bul jumysty áli de jalǵastyramyz. Eger jańa ınvestor kelip, qalaǵa kómektesýge nıet bildirse, onda, árıne, biz olarmen birge jumys isteıtin bolamyz», — deıdi Ermaǵanbet Bólekpaev.
JEO-2-degi № 7 qazandyqtyń qurylysyna keletin bolsaq, ony kelesi jyly tapsyramyz dep ýáde berdi óńir basshysy.
«Biz № 7 qazandyqty salyp bitirýdi josparlap otyrmyz. Sońǵy ret sáýir aıynda kezdesken kezde onyń daıyndyǵy joǵary boldy. Qazir elektr jelilerine qosý jumystary júrip jatyr. Bul aıaqtaý kezeńinde jasalatyn jumystyń negizgi túrleri. Qazandyqty sáýir aıyna deıin aıaqtap, tapsyrýymyz kerek. Bul JEO úshin de, jańa ınvestor úshin de birinshi kezektegi mindet», — dedi oblys ákimi.
Sondaı-aq oblys ákimi Saran qalasynda ortalyq qazandyqtyń qurylysy týraly aıtyp berdi.
«Saran qalasyna keletin bolsaq, qazandyqqa qatysty másele burynnan beri kóterilip keledi. Onda 26 qazandyq bar, olardyń jartysy jeke, jartysy kommýnaldyq menshikte. Biz ony únemi baqylap, kómektesemiz. Búgingi tańda múmkin jergilikti jerlerde, keıbir páterlerde qandaı da bir problemalar bar shyǵar, biraq búginde Saran qalasy boıynsha jylytý maýsymy turaqty jáne shtattyq rejımde ótýde. Ortalyq qazandyqqa keletin bolsaq, bul óte kúrdeli joba jáne ol uzaq ýaqyt boıy jalǵasyp keledi. Jyl basynda qarjylandyrýǵa qatysty máseleler týyndady, túzetýler engizildi. Qazir Reseı Federatsııasynan jetkiziletin jabdyqqa qatysty tehnıkalyq suraqtar bar. Jabdyqtar uzaq ýaqyt jetkiziledi. Ásirese sorǵy jabdyqtary, elektronıka. Biraq qazandyq qazir 90% daıyn. Qysta biz ony iske qospaımyz. Jylytý maýsymynyń sońyna deıin iske qosýdy josparlap otyrmyz», — dedi Qaraǵandy oblysynyń ákimi.
Sonymen qatar Qaraǵandy turǵyndary belsendi qurylys júrip jatqan qalanyń Ońtústik-Shyǵysyndaǵy jylý tapshylyǵy máselesin sheshý úshin salynyp jatqan úshinshi jylý taratqyshtyń jaǵdaıyna qatysty qyzyǵýshylyq tanytqan bolatyn. JEO-3-ten tartylyp jatqan nysannyń qurylysy jaıly óńir basshysy toqtalyp ótti.
«Shynynda da, qalada jylý energııasynyń tapshylyǵy bar. Bul jalpy tapshylyq. Biraq stantsııada jylý tapshylyǵy joq. Jylý bar, ol jaı ǵana buǵattalyp tur. Sondyqtan úshinshi jylý qubyryn sala bastadyq. Qazir bul jumys belsendi júrgizilýde. Biz kelesi jyly ony tolyǵymen tapsyryp, jelige qosýdy kózdep otyrmyz. Osylaısha, biz qalanyń Ońtústik-Shyǵys bóliginen júktemeni azaıtyp, qalanyń osy bóligin qosymsha jylý kózderimen qamtamasyz etemiz, sonyń ishinde qazir belsendi túrde júrgizilip jatqan jańa qurylystar nysandaryn da bar. Búginde qalada 800 000 m² turǵyn úı qurylysy júrgizilýde. Sondyqtan bizge jylý shyǵarǵyshtyń ashylýy óte qajet», — dedi Ermaǵanbet Bólekpaev.
