Qaraǵandy oblysy turǵyndaryna 3,1 mlrd teńgeden astam qarajat qaıtarylady

ASTANA.KAZINFORM - Qaraǵandy oblysynyń turǵyndaryna kommýnaldyq qyzmetter úshin 3,1 mlrd teńgeden astam qarajat qaıtarylady. Bul qarjyny tabıǵı monopolııa salasyndaǵy 18 kásiporyn tarıf arqyly alǵanymen, josparlanǵan maqsattarǵa tolyq jumsamaǵan.

Bul týraly Qaraǵandy oblysy boıynsha Tabıǵı monopolııalardy retteý komıteti departamenti 2024 jylǵa arnalǵan esepterdi taldaý qorytyndysy boıynsha habarlady.

Departament 73 tabıǵı monopolııa sýbektisi usynǵan 200 esepti zerdelegen. Olardyń ishinde tarıftik smetalardyń oryndalýy jáne ınvestıtsııalyq baǵdarlamalardyń júzege asyrylýy jónindegi esepter bar.

Taldaý barysynda 18 tabıǵı monopolııa sýbektisi bekitilgen tarıftik smetalarda kózdelgen birqatar jumys pen shyǵyndardy tolyq oryndamaǵany anyqtalǵan.

Zańnamaǵa sáıkes, mundaı jaǵdaıda tutynýshylarǵa qarajatty qaıtarý úshin ótemdik tarıf engiziledi. Osy tetik arqyly oblys turǵyndaryna Ulttyq bankiniń qaıta qarjylandyrý mólsherlemesin eskere otyryp, 3,1 mlrd teńge qaıtarylady.

Ótemdik tarıfter bir jyl ishinde — 2026 jylǵy 1 qańtardan 2027 jylǵy 1 naýryzǵa deıin qoldanylady.

Qaıtarylatyn qarajat qyzmet túrleri boıynsha bylaı bólinedi:

· sýmen jabdyqtaý jáne sý burý qyzmetteri – 2,27 mlrd teńge;

· elektr energııasyn jetkizý qyzmetteri – 669,6 mln teńge;

· jylýmen jabdyqtaý qyzmetteri – 107,7 mln teńge;

· kirme joldar qyzmetteri – 3,7 mln teńge;

· gazben jabdyqtaý qyzmetteri – 55,6 mln teńge.

Bul shara tarıf arqyly jınalǵan, biraq josparlanǵan baǵyttarǵa jumsalmaǵan qarajatty tutynýshylarǵa qaıtarýǵa múmkindik beredi.

Departament ókilderiniń aıtýynsha, tarıftik smetalar men ınvestıtsııalyq baǵdarlamalardyń oryndalýyn baqylaý jumystary aldaǵy ýaqytta da jalǵasady.

Aıta keteıik, 2026 jyly Smart Turmys biryńǵaı kommýnaldyq qyzmet platformasy iske qosylady.