Qaraǵandy oblysy Shahterler kúnin atap ótýde
ALMATY. KAZINFORM – Qaraǵandy oblysynda óńirdiń basty kásibı merekesi – Shahterler kúni atap ótilýde. Kenshiler memlekettik nagradalarmen jáne syılyqtarmen marapattaldy, jergilikti jáne shaqyrylǵan ártisterdiń qatysýymen kontsertter uıymdastyryldy.
Qaraǵandyda kásibı mereke qarsańynda kómir ónerkásibiniń 18 ókiline memlekettik nagradalar tabys etildi. Tórt qyzmetker "Qurmet" ordeniniń ıegeri atandy. Taǵy tórteýi III dárejeli "Eńbek Dańqy" ordenimen marapattalyp, on adam "Eren eńbegi úshin" medalin aldy. Memleket basshysynyń atynan marapatty Qaraǵandy oblysynyń ákimi Ermaǵanbet Bólekpaev tabys etti.
Vedomstvolyq nagradalardy tapsyrý úshin Qaraǵandyǵa QR ónerkásip jáne qurylys vıtse-mınıstri Oljas Saparbekov keldi. Aımaq kenshileri І, ІІ, ІІІ dárejeli "Shahter dańqy", "Eńbek dańqy" tósbelgilerimen jáne "Eńbek ardageri" medaldarymen marapattaldy.
Qarmet basshylyǵy kenshilerdi baǵaly syılyqtarmen marapattady. 11 qyzmetkerge jeńil avtokólik tabystaldy.
24 tamyzda Qaraǵandydaǵy Táýelsizdik alańy merekelik sharalardyń ortalyǵyna aınaldy.
Munda birneshe myń adam jınaldy. Óz ónerlerimen Luina, Ninety One, "Band'Eros" toby jáne basqa da kóptegen ártister kórermenderdi qýantty.
Merekelik shara túrli-tústi otshashýmen aıaqtaldy.
Qazaqstandyq Shiza, RaiM jáne JUZBIR juldyzdarynyń qatysýymen merekelik kontsertter 25 tamyzda Abaı, Saran jáne Shahtınsk qalalarynda ótti. Qaraǵandy oblysynyń ákimi bul qalalarda bolyp, kenshilerdi Shahterler kúnimen quttyqtap, oladyń qajyrly eńbegi men kúndelikti erligi úshin alǵysyn bildirdi.
– Qurmetti jerlester, Shahterdiń eńbegi – bul kásip, jaýapkershilik jáne rýhtyń kúshi. Sizder bizdiń úılerimizdi energııamen jáne jylýmen qamtamasyz etesizder, eldiń ekonomıkalyq tiregin qoldaısyzdar. Biz óz sheberlikterin urpaqtan-urpaqqa jetkizetin eńbek áýletterimizdi maqtan tutamyz. Sizderdiń kúshterińiz, sizderdiń rýhtaryńyz bizdiń aımaqty erekshe etedi. Merekemen shyn júrekten quttyqtaımyn jáne shańyraqtaryńyz bıik, jumystaryńyz jemisti bolsyn dep tileımin! – dedi Ermaǵanbet Bólekpaev.
Shahterler kúni dástúrli túrde jazdyń sońǵy jeksenbisinde, bıyl 25 tamyzda atap ótiledi.
