Qaraǵandy oblysy aýyldarynyń birinde karantın jarııalandy

QARAǴANDY. KAZINFORM – Qaraǵandy oblysy Qarqaraly aýdany Martbek Mamyraev aýyldyq okrýginde mal ólimine baılanysty karantın jarııalandy. Aýylda emfızematozdy karbýnkýl tabyldy, dep habarlaıdy Kazinform agenttiginiń tilshisi.

2024 jylǵy 2-5 qyrkúıek aralyǵynda «Aıbol» sharýa qojalyǵynyń «Sartaý» qystaýynda 14 bas úsh aılyq buzaý qyrylyp qalǵan.

«5 qyrkúıekte aýmaqtyq ınspektsııa jáne veterınarlyq stantsııa mamandary patologııalyq materıaldardy jınap, QR AShM „RVL“ ShJQ RMK Qaraǵandy oblystyq fılıalyna jetkizdi. Zertteý nátıjesi boıynsha emkar dertine oń nátıje kórsetti», - dep habarlady QR AShM Veterınarııalyq baqylaý jáne qadaǵalaý komıtetiniń Qaraǵandy oblystyq aýmaqtyq ınspektsııasy.

Saraptama aktisi jáne epızootologııalyq tekserý aktisi negizinde aýyly ákiminiń sheshimimen «Sartaý» qystaý aýmaǵynda karantındik sharalar jarııalandy.

«Saýyqtyrý-joıý is-sharalaryn QR AShM VQBK „RPO“ RMM kúshteri ótkizedi. Qyrylǵan janýarlar boıynsha zalaldy óteý respýblıkalyq bıýdjet esebinen júzege asyrylady», - dep tolyqtyrdy vedomstvoda.

Mamandardyń túsindirýinshe, sharýashylyq júrgizýshi sýbekt karantındegi janýardyń emfızematozdy karbýnkýldan saýyǵyp ketýiniń nemese ólýiniń sońǵy oqıǵasy tirkelgen kúnnen bastap 14 kúntizbelik kúnnen keıin jáne qorytyndy dezınfektsııa júrgizilgennen keıin ǵana karantın alynady.

Emfızematozdy karbýnkýl nemese emkar — Clostridium chauvoei bakterııasy týdyratyn janýarlardyń jedel, juqpaly emes aýrýy. Derke shalynǵan janýarda aqsaqtyq, krepıtıkalyq isiný baıqalady jáne aýrý janýar qysqa merzimde ólip qalady.