Qaraǵandy men Ulytaýdy jalǵaıtyn jol qurylysy qarqyn aldy
ASTANA. KAZINFORM — Qaraǵandy — Jezqazǵan avtojolynda 2,2 mln tekshe metrden astam topyraq tóseý jumystary oryndaldy.
Uzyndyǵy 457 shaqyrym bolatyn «Qaraǵandy — Jezqazǵan» avtojolynyń qurylysy qarqyn alyp keledi. Búginge deıin 140,8 shaqyrymda topyraqtyń qunarly qabaty alynyp, 2,285 mln tekshe metr jer tóseminiń úıindisi tóseldi. Qurylysqa 450 jol-qurylys tehnıkasy men 676 maman jumyldyrylǵan.
Qaraǵandy jáne Ulytaý oblystaryn baılanystyratyn jańa jol 448–905-shaqyrymdar aralyǵynda salynyp jatyr. Joba boıynsha II tehnıkalyq sanattaǵy avtomobıl joly salynady.
Qazir negizgi kúsh jol negizin daıyndaýǵa jáne jer tósemin qalyptastyrýǵa baǵyttalǵan. Sonymen qatar geodezııalyq jáne ınjenerlik-geologııalyq zertteýler júrgizilip, uńǵymalar burǵylanýda, joldyń osi belgilenýde. Topyraqtyń qunarly qabaty alynǵan aýmaqtyń jalpy kólemi 6,8 mln sharshy metrden asady.
Qurylys alańdarynda óndiristik bazalar men vahtalyq qalashyqtardy jabdyqtaý, topyraq jáne tas karerlerin daıyndaý jumystary da jalǵasýda. Qajetti qurylys materıaldary ázirlenip, nysanǵa jetkizilip jatyr. Jekelegen bólikter daıyn bolǵan saıyn qurylys-montaj jumystarynyń aýqymy keńeıip keledi.
«Qaraǵandy — Jezqazǵan» avtojolynyń qurylysy — Ortalyq Qazaqstandaǵy iri ınfraqurylymdyq jobalardyń biri. Jańa jol paıdalanýǵa berilgennen keıin eki óńir arasyndaǵy sapar ýaqyty qysqaryp, qozǵalys qaýipsizdigi artady. Sondaı-aq Qaraǵandy jáne Ulytaý oblystarynyń kólik baılanysy jaqsarady.
Aıta ketelik Mańǵystaýda jol jóndeý jumysyna bólingen qarjydan 2,7 mlrd teńge qysqartyldy.
