Qaraǵandy men Temirtaý arasyndaǵy jolda 500 avtokólik kepteliste turyp qaldy

QARAǴANDY. KAZINFORM — Qaraǵandy oblysynda aýa raıynyń kúrt nasharlaýyna baılanysty negizgi tasjoldarda qozǵalys ýaqytsha shekteldi. Polıtsııa qyzmetkerleri júrgizýshilerge nusqaýlyq ótkizip, qalalar arasyndaǵy avtokolonnalardyń qaýipsiz qozǵalysyn qamtamasyz etip jatyr.

2025 jylǵy 30 jeltoqsanda Qaraǵandy oblysynda aýa raıynyń nasharlaýy barlyq baǵyttaǵy joldardyń jabylýyna ákeldi. Aýa temperatýrasy tómendep, qarly jańbyr men kóktaıǵaq saldarynan respýblıkalyq mańyzy bar segiz, oblystyq mańyzy bar úsh jol ýchaskesinde barlyq kólik úshin qozǵalys shekteldi.

— Qazirgi tańda Temirtaý qalasynan Qaraǵandyǵa jáne keri baǵytta avtokolonnalardy qaýipsiz súıemeldeý uıymdastyrylyp otyr. Jolda shamamen 500 avtokólik bar. Sonymen qatar, Temirtaýdan Qaraǵandyǵa qaıtyp kele jatqan 300 kólikti de súıemeldep jetkizemiz, — dep habarlady Qaraǵandy oblysy patrýldik polıtsııa batalonynyń komandıri Medet Nurmuhanov.

Polıtsııa júrgizýshilerge aýa raıy kúrt nasharlaǵan jaǵdaıda joldaǵy qaýipsizdik sharalary men qozǵalys erejelerin túsindirip jatyr.

Astana qalasyna baratyn jol tolyqtaı jabyq.

Qaraǵandy oblysynyń Tótenshe jaǵdaılar departamenti turǵyndar men qala qonaqtaryna úndeý jasap, asa qajet bolmasa, eldi mekenderde qalýyn, uzaq saparǵa shyqpaýdy, saqtyq sharalaryn qatań saqtaýdy jáne tek resmı aqparat kózderine súıenýdi suraıdy.

Tótenshe jaǵdaı týyndaǵan jaǵdaıda 112 nómirine habarlasý qajet.

Eske salsaq, buǵan deıin «QazAvtoJol» UK» AQ Qazaqstandaǵy avtomobıl joldaryndaǵy aǵymdaǵy jaǵdaı týraly málimet bergen bolatyn.