Qaraǵandy medıtsına ýnıversıtetiniń rektory aýysty
ASTANA. KAZINFORM — Baqyt Kósherova «Qaraǵandy medıtsına ýnıversıteti» kommertsııalyq emes aktsıonerlik qoǵamyna basshylyq etedi, dep habarlaıdy DSM baspasóz qyzmeti.
— «Qaraǵandy medıtsına ýnıversıteti» kommertsııalyq emes aktsıonerlik qoǵamynyń Basqarma Tóraǵasy — Rektory laýazymyna respýblıkalyq komıssııa otyrysynyń hattamasyna sáıkes medıtsına ǵylymdarynyń doktory, professor Baqyt Nurǵalıqyzy Kósherova taǵaıyndaldy, — delingen habarlamada.
Baqyt Nurǵalıqyzy — medıtsına ǵylymdarynyń doktory, professor, joǵary sanatty ınfektsıonıst dáriger, densaýlyq saqtaý júıesinde 35 jyldan astam, onyń ishinde 30 jyl — medıtsınalyq bilim berý salasynda jáne 20 jyldan astam — basshylyq laýazymdarda jumys tájirıbesi bar.
Ol QR Densaýlyq saqtaý mınıstrliginiń bas shtattan tys ınfektsıonısti, QR DSM sapa jónindegi birikken komıssııanyń klınıkalyq hattamalar komıtetiniń basshysy, «Infektsıonıst-dárigerler qoǵamy» RQB basqarma tóraǵasynyń orynbasary jáne ARTA halyqaralyq sarapshysy qyzmetin atqarady.
Óziniń kásibı qyzmeti jyldarynda Baqyt Nurǵalıqyzy medıtsınalyq bilim berý jáne densaýlyq saqtaý júıesinde birqatar strategııalyq mańyzdy jobaǵa bastamashy boldy jáne tabysty iske asyrdy, onyń ishinde: Qaraǵandy medıtsına ýnıversıtetiniń janyndaǵy medıtsınalyq kolledjdiń ashylýy, QMÝ KeAQ konsýltatsııalyq-dıagnostıkalyq ortalyǵy men ýnıversıtettik klınıkasynyń ashylýy.
COVID-19 pandemııasy kezinde onyń basshylyǵymen Qaraǵandy medıtsına ýnıversıtetiniń bazasynda karantındik ortalyq, provızorlyq jáne ınfektsııalyq statsıonarlar uıymdastyryldy.
Baqyt Kósherova — 160-tan astam ǵylymı jarııalanymnyń, oqý quraldary men oqýlyqtardyń avtory.
Onyń eńbegi memlekettik nagradalarmen, onyń ishinde: «QURMET» ordenimen, «QR Bilim berý isiniń qurmetti qyzmetkeri», «Y.Altynsarın», «QR densaýlyq saqtaý isiniń úzdigi» tósbelgilerimen, sondaı-aq «Halyq alǵysy», «Sharmanov halyqaralyq medali», «Qazaqstan máslıhatyna 20 jyl» medaldarymen jáne t. b. marapattaldy.
Buǵan deıin Bolat Tókejanov Densaýlyq saqtaý mınıstrligi apparatynyń basshysy bolyp taǵaıyndalǵanyn habarlandy.