Qaraǵandy medıtsına ýnıversıtetine Petr Pospelovtiń esimi berildi
QARAǴANDY. KAZINFORM — Ortalyq Qazaqstanda dárigerler daıarlaý isiniń bastaýynda turǵan tulǵanyń esimi endi elimizdegi medıtsınalyq joǵary oqý oryndarynyń birine berildi. Tıisti sheshim ınstıtýtty shırek ǵasyrǵa jýyq basqarǵan, ulttyq medıtsınalyq kadrlardy daıarlaýǵa zor úles qosqan ǵalymnyń týǵanyna 125 jyl tolýy qarsańynda qabyldandy.
Qazaqstan Prezıdenti Qasym-Jomart Toqaevtyń tapsyrmasymen Qaraǵandy medıtsına ýnıversıtetine Petr Moıseevıch Pospelovtiń esimi berildi. Memleket basshysy bul sheshimdi tarıhı ádilettilikti qalpyna keltirý dep atady.
Saltanatty rásimge medıtsına ǵylymy men bilim berý salasynyń ókilderi, ýnıversıtet ardagerleri, Qazaqstannyń jáne shetelderdiń joǵary oqý oryndary, ǵylymı ortalyqtar men kompanııalardyń basshylary qatysty.
Petr Pospelov Ortalyq Qazaqstandaǵy joǵary medıtsınalyq bilim berý júıesiniń negizin qalaýshylardyń biri boldy. Ol 1950 jyly ınstıtýt ashylǵan kezden bastap ony 25 jylǵa jýyq basqardy. Osy kezeńde burynǵy feldsherlik-akýsherlik mekteptiń ǵımaratynda ornalasqan shaǵyn oqý orny iri bilim berý jáne ǵylymı ortalyqqa aınaldy.
Pospelov ulttyq medıtsınalyq kadrlardy daıarlaýǵa jáne aýyl jastaryn qoldaýǵa erekshe kóńil bóldi. Onyń basshylyǵy kezinde joǵary oqý ornynda eki myńnan astam qazaq dáriger bilim aldy. Ýnıversıtettiń alǵashqy rektorynyń ózi qazaq tilin úırenip, naýqastarmen erkin sóılesken.
Densaýlyq saqtaý vıtse-mınıstriniń birinshi orynbasary Tımýr Sultanǵazıev ýnıversıtetke Pospelovtiń esimin berý ǵalymnyń eńbegin moıyndaýmen qatar, qazirgi ujymǵa úlken jaýapkershilik júkteıtinin atap ótti.
— Ujym otandyq medıtsınalyq mekteptiń úzdik dástúrlerin saqtap, olardy jańa ǵylymı jáne praktıkalyq jetistiktermen tolyqtyratynyna senimdimin, — dedi Tımýr Sultanǵazıev.
Alǵashqy rektordyń óńirdegi medıtsınalyq bilim berýdi damytýǵa qosqan úlesi týraly densaýlyq saqtaý salasynyń ardageri, medıtsına ǵylymdarynyń doktory Qanat Ermekbaev aıtyp berdi. Onyń sózinshe, Pospelov oblysqa óz dárigerleri qajet ekenin jaqsy túsinip, medıtsınalyq ınstıtýt ashýǵa kúsh salǵan. Sonymen qatar ol aýyldyq jerlerden kelgen talapkerlerdi qoldap, olardyń medıtsınalyq bilim alý múmkindikterin keńeıtýge kómektesken.
Qazir Qaraǵandy medıtsına ýnıversıtetinde toǵyz myńnan astam stýdent bilim alyp jatyr. Bakalavrıat, magıstratýra, rezıdentýra jáne doktorantýra deńgeılerinde 79 bilim berý baǵdarlamasy boıynsha mamandar daıarlanady.
Buǵan deıin Ulttyq ǵylym akademııasynyń 80 jyldyǵyn atap ótkenin habarlaǵan bolatynbyz.
