Qaraǵandy mańynda jolaýshylary bar avtobýs «Gazelmen» soqtyǵysty
QARAǴANDY. KAZINFORM — Jol-kólik oqıǵasy oblys ortalyǵyna jaqyn mańdaǵy qala syrtyndaǵy jolda bolǵan. Tórt adam medıtsınalyq mekemelerge jetkizilip, olardyń ekeýi dárigerlerdiń baqylaýynda alyndy.
Apat 8 qyrkúıekte Qaraǵandydan shamamen úsh shaqyrym jerde, «Volynskıı» mal sharýashylyǵy qojalyǵynyń mańynda bolǵan. «Gazel» avtokóligi men «Qaraǵandy — Jáırem» baǵyty boıynsha qatynaıtyn marshrýttyq avtobýs soqtyǵysqan.
Qaraǵandy oblysynyń Polıtsııa departamentiniń málimetinshe, jol apatynan «Gazel» kóliginiń júrgizýshisi men jolaýshysy, sondaı-aq marshrýttyq avtobýstyń eki jolaýshysy jaraqat alǵan. Zardap shekkenderdiń barlyǵy medıtsınalyq mekemelerge jetkizilgen.
— Jol-kólik oqıǵasy faktisi polıtsııada tirkeldi. Qazirgi ýaqytta bolǵan jaǵdaıdyń barlyq mán-jaıy anyqtalyp jatyr, — dep habarlady Qaraǵandy oblysy PD baspasóz qyzmeti.
Qaraǵandy oblysynyń Densaýlyq saqtaý basqarmasy eki naýqasty tekserýden keıin ambýlatorııalyq em alýǵa jibergenin naqtylady. Taǵy eki adam statsıonarda em qabyldap jatyr.
— Naýqastardyń biriniń jaǵdaıy aýyr. Ekinshisiniń jaǵdaıy ortasha aýyrlyqta, turaqty dep baǵalanyp otyr. Eki zardap shegýshige medıtsınalyq kómek kórsetilgennen keıin ambýlatorııalyq em alýǵa jiberildi, — dep habarlady vedomstvo.
Polıtsııa júrgizýshilerdi jol qozǵalysy erejelerin saqtaýǵa, jol jáne aýa raıy jaǵdaıyna qaraı jyldamdyqty durys tańdaýǵa, qaýipsiz araqashyqtyqty saqtaýǵa jáne qala syrtyndaǵy joldarda barynsha muqııat bolýǵa shaqyrdy.
Apattyń sebepteri men barlyq mán-jaıy anyqtalyp jatyr.
Eske salaıyq, 6 qyrkúıek kúni tańerteń Qaraǵandyda jeńil avtokólik pen marshrýttyq avtobýs soqtyǵysqan jol apaty bolǵan edi. Oqıǵa ornynda bir adam qaza tapty.
