Qaraǵandy mańynda kólik pen poıyz soqtyǵysyp, 5 adam zardap shekti

QARAǴANDY. KAZINFORM — Qaraǵandy mańyndaǵy temirjol ótkelinde jeńil avtokólik júk poıyzymen soqtyǵysty. Oqıǵa saldarynan bes adam jaraqat aldy. Qazir apattyń sebepteri anyqtalyp jatyr.

«Qaraǵandy — Sortırovochnaıa — Qulaıǵyr» ýchaskesinde bolǵan jol-kólik oqıǵasy boıynsha polıtseıler qylmystyq is qozǵady. Aldyn ala derekterge sáıkes, Audi kóliginiń júrgizýshisi tyıym salatyn qyzyl jaryqqa qaramastan temirjol ótkeline júrip ketken. Sol sátte osy baǵytta júrip kele jatqan júk poıyzy kólikti soqqan.

— Soqqy saldarynan 35 jastaǵy júrgizýshi men onyń tórt jolaýshysy túrli dene jaraqattaryn alyp, shuǵyl túrde medıtsınalyq mekemelerge jetkizildi, — dep habarlady Qaraǵandy oblystyq PD baspasóz qyzmeti.

Qazir olardyń jaǵdaıyn dárigerler anyqtap jatyr. Polıtseıler oqıǵanyń barlyq qatysýshylarynyń áreketterine qoldanystaǵy zańnamaǵa sáıkes quqyqtyq baǵa berý maqsatynda jan-jaqty tergeý júrgizip jatyr.

Qaraǵandy oblysy Polıtsııa departamenti temirjol ótkelinen ótý erejelerin buzý — adamdardyń ómiri men densaýlyǵyna tikeleı qaýip tóndiretin óreskel ári jol berilmeıtin áreket ekenin atap ótti.

— Barlyq kináliler zań boıynsha jaýapqa tartylady, — dep málimdedi vedomstvonyń baspasóz qyzmeti.

Eske salsaq, buǵan deıin Qaraǵandy oblysynyń Moıynty — Shyǵanaq ýchaskesinde júk poıyzy temir jol boıynda jumys istep júrgen tórt adamdy qaǵyp ketip, olar oqıǵa ornynda kóz jumǵan bolatyn. 

Atalǵan derek boıynsha qylmystyq is qozǵaldy.