Qaraǵandy kitaphanasynda Baýyrjan Momyshulynyń mol murasy nasıhattalmaq
QARAǴANDY. KAZINFORM — Qaraǵandyda aǵymdaǵy jóndeý jumystary aıaqtalyp, Baýyrjan Momyshuly atyndaǵy kitaphana qaıta ashyldy. Jańarǵan mádenıet oshaǵynda oqyrmandar qazaq jáne orys tilderindegi san alýan janrdaǵy ádebıettermen tanysyp, rýhanı ári tanymdyq mazmundaǵy túrli is-sharalarǵa qatysa alady.
Jańartylǵan kitaphana Qaraǵandy qalasynyń Ortalyqtandyrylǵan kitaphana júıesine kiredi. Jóndeý jumystary júrgizilgennen keıin mekeme oqyrmandaryn qaıta qabyldaı bastady.
Kitaphana qorynda qazaq jáne orys tilderindegi túrli janr men baǵyttaǵy basylymdar jınaqtalǵan. Oqyrmandar kórkem ádebıetten bastap tarıhı jáne tanymdyq kitaptarǵa deıin óz qyzyǵýshylyǵyna saı ádebıetterdi tańdaı alady.
Kitaphana qorynan Baýyrjan Momyshulynyń ómiri men shyǵarmashylyǵyna, áskerı qyzmeti men ádebı murasyna arnalǵan eńbekter de erekshe oryn alady. Dańqty qolbasshy ári qalamger týraly jınaqtalǵan materıaldar tarıhı jadyny saqtaý, onyń ónegeli ómir joly men shyǵarmashylyq murasyn óskeleń urpaqqa nasıhattaýǵa baǵyttalǵan.
Jańarǵan kitaphanada aldaǵy ýaqytta kitap kórmeleri, ádebı keshter, patrıottyq kezdesýler, tanymdyq is-sharalar uıymdastyrylyp, balalar men jastarǵa arnalǵan túrli jobalar júzege asyrylady.
Kitaphananyń jóndeýden keıin qaıta ashylýy qala turǵyndary úshin kitap oqýǵa, bilimin jetildirýge jáne mazmundy mádenı demalys ótkizýge jańa múmkindikter beredi. Sonymen qatar mekeme jastardyń ádebıetke, tarıhqa jáne ulttyq qundylyqtarǵa degen qyzyǵýshylyǵyn arttyrýǵa baǵyttalǵan mádenı-bilim berý is-sharalary ótetin mańyzdy alańǵa aınalmaq.
Buǵan deıin Astanada 15 kitap oqyp, 600 myń teńge utyp alýǵa bolatynyn habarlaǵan bolatynbyz.
