«Qaraǵandy kámpıtteriniń» óndirisi qaıta jandanýy múmkin

QARAǴANDY. KAZINFORM — Ataqty «Qaraǵandy kámpıtteri» kondıterlik fabrıkasy jaqyn arada iske qosylýy múmkin. Bul úshin 200 mln dollardan astam qarajat qajet.

Osydan 10 jyl buryn jabylǵan kondıterlik fabrıkanyń qaıta iske qosylatyny jaıly Qaraǵandy oblysynyń ákimi Ermaǵanbet Bólekpaev óńirdiń jýrnalısterimen kezdesýde málim etti. Aımaq basshysynyń aıtýynsha, fabrıka jańadan salynady. 

— Biz búgin aktsıonerlermen sóılestik. Qazirgi ýaqytta Prıshahtınsk aýdanynda 20 gektardan astam jerdi belgileýdi kózdep otyrmyz. Bir aıdyń ishinde bul máselelerdi sheshemiz. Bul qalanyń iri jobalarynyń biri bolmaq. Aktsıonerdiń jeke qarajaty men nesıelik qarajat salynady, — dep habarlady oblys ákimi.

Joba quny shamamen 200 mln AQSh dollaryn quraıdy. Fabrıka ǵımaraty qaıta salynady. Sondaı-aq óndiristi zamanaýı tehnologııalarmen jabdyqtaý josparlanyp otyr. Jobaǵa Aýstrııa jáne Shveıtsarııa kompanııalary qatysady dep kútilýde.

Ákimniń aıtýynsha, aktsıonerler eksportqa basa nazar aýdarmaqshy. Negizinen ónim Birikken Arab Ámirlikterine jóneltiledi dep josparlanǵan.

— Aktsıonerler ishki naryqqa shyǵyp qana qoımaı, eksportqa da basa nazar aýdarýǵa nıetti. Bul rette eksport Arab elderine baǵyttalady dep josparlanyp otyr. Sebebi suranys bar. Sondyqtan munyń barlyǵy egjeı-tegjeıli pysyqtalatyn bolady, — dep qosty Ermaǵanbet Bólekpaev.

Buǵan deıin qazaqstandyq kompanııalar shokolad pen kondıterlik ónimderge suranysty 47,2%-ǵa qamtamasyz etkeni jaıly habarlaǵan bolatynbyz.