Qaraǵandy qalasynyń aýmaǵy keńeıedi
ASTANA. KAZINFORM – Qaraǵandy oblystyq máslıhatynyń depýtattary Qaraǵandy qalasynyń bas jospary jobasyn maquldady. Qazir ony túzetý jumystary aıaqtalýǵa jaqyn.
Qoldanystaǵy Qaraǵandy qalasynyń bas jospary 2007 jyldan beri ózgertilmegen. Zańnamaǵa sáıkes, bul joba qala qurylysy saraptamasynan, sondaı-aq barlyq jergilikti talqylaý jáne kelisý kezeńderinen ótti. Oblystyq máslıhattyń kezekten tys XXVI sessııasynda depýtattar bul jobany maquldady. Endi qujat kelisý men túpkilikti sheshim qabyldaý úshin Úkimetke joldanady.
Qala ákimi Meıram Qojyqov atap ótkendeı, bas jospar jobasynda Qaraǵandyny 2040 jylǵa deıin damytý kózdelgen. Jańa qujatta aýmaqty uıymdastyrý, ınjenerlik jáne áleýmettik ınfraqurylym, kólik pen ekologııalyq sheshimderdiń negizgi qaǵıdattary kórsetilgen.
− Jobada qala aýmaǵy 50 myń gektarǵa deıin ulǵaıtyldy. Bul ulǵaıý Kókpekti aýylyn jáne «Saryarqa» áýejaıyn qosý arqyly júrgizilmek. 2040 jylǵa qaraı qala halqynyń sany 614 myń adamǵa jetedi dep boljanǵan. Qalanyń bolashaqta damýy úshin soltústik-shyǵys baǵyt − Ońtústik-Shyǵys pen Maıqudyq aýdandary arasyndaǵy «Golýbye prýdy» aýdany tańdaldy. Munda 150 gektardan astam aýmaqta 25-30 myń adamǵa arnalǵan, jalpy kólemi 800 myń sharshy metrge jetetin turǵyn úıler salynady jáne mektepter, balabaqshalar, densaýlyq saqtaý mekemeleri men sporttyq-áleýmettik ortalyqtar ornalaspaq. Sondaı-aq bul keshen Trıatlon parki men «Qarat» ıppodromy bar ortaq keńistikke aınalady, − dedi Meıram Qojyqov.
Qala ákimi negizgi sheshimderge de toqtaldy. Josparlanǵan jańa magıstral Ońtústik-Shyǵys, Maıqudyq jáne Prıshahtınskini biriktirip, Almaty-Astana avtojolyna jol ashady.
Velosıpedshiler de umyt qalmaǵan: 2040 jylǵa deıin keminde 300 shaqyrym velosıped joly salynýy kerek.
Ortalyq ónerkásiptik aımaqty qaıta jańǵyrtýǵa erekshe kóńil bólingen – bul aımaq saýda-keńse aýdany bolyp jańǵyrtylady.
Jańa aýdandardyń turaqty elektrmen qamtylýy úshin qosalqy stantsııalar qurylysy men qaıta jańǵyrtylýy josparlanǵan. Sonymen birge, qalany keshendi gazdandyrý aıasynda barlyq jańa turǵyn aýdandardy tabıǵı gaz júıesine qosý kózdelip otyr. Bas josparǵa jańa JEO-4 (jylý elektr ortalyǵy) qurylysy da engen.
Áleýmettik ınfraqurylym boıynsha 2040 jylǵa deıin 36 jańa mektep, 44 balabaqsha, 10 densaýlyq saqtaý nysany jáne 10 dene shynyqtyrý-saýyqtyrý keshenin salý qajet.
Qalany kógaldandyrý da jalǵasady – jańa saıabaqtar men skverler paıda bolady.
Oblystyq máslıhat tóraǵasy Nurken Kóbjanov atap ótkendeı, qala qurylysy qujatyn talqylaý barysynda depýtattar 50-den astam usynys bergen jáne olardyń barlyǵy eskerilgen.
Buǵan deıin Berik Ýálı Abaı oblysynyń damý josparyn tanystyrǵan edi.