Qaraǵandy qalalyq polıtsııa basqarmasy bastyǵynyń orynbasary jol apatynan qaza boldy
QARAǴANDY. KAZINFORM - Qaraǵandy qalasy polıtsııa basqarmasy bastyǵynyń orynbasary Bekjan Qusaıynov jol apatyna ushyrap, oqıǵa ornynda qaza boldy.
Qaıǵyly oqıǵa jeksenbiden dúısenbige qaraǵan túni Qarqaraly aýdanynyń janynda bolǵan. Marqum eńbek demalysynda bolǵan.
- 53 jasynda Qaraǵandy qalasynyń polıtsııa basqarmasy bastyǵynyń orynbasary - polıtsııa polkovnıgi Bekjan Tóleýuly Qusaıynov qaza boldy. Ol 30 jyldan astam ómirin Otanǵa qyzmet etýge, qoǵamdyq qaýipsizdikti qamtamasyz etýge jáne quqyq tártibin qorǵaýǵa arnaǵan. Eńbek jolyn 1992 jyly Qaraǵandy oblysynyń Qarqaraly aýdandyq ishki ister bóliminiń patrýldik-bekettik qyzmetiniń mılıtsıoneri qyzmetinen bastady.
Qyzmettik baspaldaqtyń barlyq satysynan ótip, ár jyldary jaýapty laýazymdardy, sonyń ishinde Qaraǵandy qalasynyń polıtsııa basqarmasy bastyǵynyń orynbasary laýazymyn atqardy. Ol árdaıym joǵary kásibı daıyndyǵymen, ózine jáne áriptesterine joǵary talap qoıýymen, tabandylyǵymen, adamgershiligimen jáne adamdarǵa degen qurmetimen erekshelendi, - dep habarlaıdy Qaraǵandy oblysy polıtsııa departamentiniń baspasóz qyzmeti.
Qaraǵandy oblysy polıtsııa departamentiniń basshylyǵy, ishki ister organdarynyń ardagerler keńesi jáne barlyq jeke quram marqumnyń týǵan-týystary men jaqyndaryna shyn júrekten kóńil aıtty.
Osyǵan deıin Qaraǵandy mańynda jol apatynan eki adam kóz jumǵany jaıly jazǵan bolatynbyz.