Qaraǵandy haıýanattar baǵynda polıar qasqyrlary paıda boldy
QARAǴANDY. KAZINFORM - Qaraǵandy haıýanattar baǵynyń turǵyndary qataryn Arktıkanyń qatań tabıǵatyna beıimdelgen sırek jyrtqyshtar tolyqtyrdy. Bir jastan endi asqan Erla men Gýlıa jańa qorshaýyna ornalastyrylyp, ázirge beıtanys ortaǵa birtindep beıimdelip jatyr.
Jasy 1 jyldan asqan qasqyrlar Qaraǵandyǵa 10 qyrkúıekte jetkizilgen.
Jańa mekenine kelgen alǵashqy kúnderi qasqyrlar tynyshtyqta beıimdelý kezeńinen ótip jatyr. Olar qorshaýdyń ár buryshyn zerttep, aýmaqty barlap, aınalasyndaǵy jańa ortaǵa úırený ústinde, Sondyqtan ázirge jyrtqyshtar saqtyq tanytyp, kelýshilerdiń nazaryna birden ilige qoımaıdy.
Baqqa barǵandar qasqyrlardyń bireýin ǵana kóredi. Ol qorshaý ishinde asyqpaı qozǵalyp, mańaıyn muqııat baqylap júrgendi unatady. Al ekinshisi kózden tasa, ońasha jerde tynyǵyp jatqandy qalaıdy.
Polıar qasqyrdyń basty ereksheligi – aqshyl ári qalyń júninde. Jaqynnan qaraǵanda onyń aq tústi terisinen, ásirese arqa tusynan, kúńgirtteý túkterdi ańǵarýǵa bolady. Qalyń ári úlpildek quıryǵy da bul jyrtqyshtyń ózindik sıpatyn aıqyndaı túsedi.
Polıar qasqyrynyń júni áldeqaıda ashyq, al quıryǵy uzynyraq kórinedi. Degenmen eki janýardyń da dene turqy salystyrmaly túrde shaǵyn. Qalyń júni olardy shyn mánindegi kóleminen irileý etip kórsetedi.
Erla men Gýlıa Qaraǵandy haıýanattar baǵyndaǵy alǵashqy polıar qasqyrlary.
Polıar qasqyrlaryn arktıkalyq nemese aq qasqyr dep te ataıdy. Tabıǵı ortada bul túr tarmaǵy Soltústik Amerıkanyń soltústik bólikteri men Grenlandııany mekendeıdi.
Polıar qasqyrynyń syrtqy bitiminiń ereksheligi onyń tabıǵı ortasyna baılanysty qalyptasqan. Qalyń ári aqshyl júni qarly keńistikte kózge túspeı jasyrynýǵa jáne dene jylýyn saqtaýǵa kómektesedi. Al qulaǵy men tumsyǵynyń qysqalaý bolýy sýyq klımat jaǵdaıynda jylýdy barynsha saqtaýǵa múmkindik beredi.
Endi Qaraǵandy turǵyndary men qala qonaqtarynyń soltústiktiń erekshe jyrtqyshtaryn jaqynnan tamashalaýǵa múmkindigi bar.
Buǵan deıin Qazaqstanda haıýanattar baǵynyń sany sońǵy jyldary aıtarlyqtaı azaıǵanymen, saladaǵy qyzmet kólemi ósip kele jatqanyn habardaǵan bolatyn.
