Qaraǵandy fýtbol klýby jeke menshikke ótti
QARAǴANDY. KAZINFORM — Qaraǵandynyń «Shahter» fýtbol klýby aýktsıon nátıjesinde resmı túrde jekeshelendirildi. Bul qadam óńirde buqaralyq fýtboldy damytýǵa jáne jańa sporttyq ekojúıe qalyptastyrýǵa baǵyttalǵan keń aýqymdy transformatsııanyń bastaýy boldy.
Qaraǵandynyń «Shahter» klýbyn qazaqstandyq kásipkerge tıesili iri bıznes-toptyń quramyna kiretin kompanııa satyp aldy. Saýda ashyq aýktsıon formatynda ótti. Jekeshelendirý protsesi zańnama talaptaryna tolyq saı júrgizildi: klýb múlki aldyn ala jan-jaqty baǵalanyp, endi saýda nátıjeleri boıynsha satyp alý-satý kelisimsharty rásimdelmek.
Klýb úshin jańa kezeń bastaldy — ınfraqurylymdy jańǵyrtý, basqarý modelin kúsheıtý jáne fýtbol ekojúıesin keshendi damytý. Óńir ákimi Freedom Holding Corp. tobynyń kompanııasymen birlesip oblysta jańa fýtboldyq júıe qalyptastyryp jatyr. Infraqurylym men jas talanttardy qoldaýǵa 18,5 mlrd teńge baǵyttaý josparlanǵan: onyń 12 mlrd teńgesi — fýtbol akademııasyn salýǵa, 6,5 mlrd teńgesi — balalar, jasóspirimder jáne buqaralyq fýtboldy damytýǵa jumsalady.
Qaraǵandy oblystyq fýtbol qaýymdastyǵynyń prezıdenti qoldaýymen birneshe bastama iske asyp jatyr:
ALGA! mektep jobasy — 2029 jylǵa deıin 40 myńnan astam mektep oqýshysy men 3 600 stýdentti qamtıdy;
resmı BFL balalar-jasóspirimder lıgasy;
jańa «Shahter» fýtbol akademııasyn salý;
óńirlik fýtboldy damytýdyń keshendi strategııasy.
Bul bastamalardyń ózegi balalar men jasóspirimder fýtbolyn júıeli damytý, zamanaýı ınfraqurylym qurý jáne áleýmettik baǵdarlamalar engizý.
Bolashaq fýtbol akademııasy shamamen 10 gektar aýmaqta ornalasady. Jobaǵa zamanaýı stadıon, jyl boıy jattyǵýǵa múmkindik beretin jabyq manej, tolyq ólshemdi alań, eki qabatty ákimshilik-turmystyq korpýs, medıtsınalyq ortalyq, basseın, saýna, ashana jáne jataqhana kiredi. Barlyq nysan jyly ótkeldermen biriktiriledi. Janynan vorkaýt-aımaq, jattyǵý alańdary, býlvar jáne avtoturaq salynady. Negizgi qurylys-montaj jumystary 2027 jyly aıaqtalady dep josparlanǵan.
Kadrlyq áleýetke de erekshe kóńil bólinbek: jattyqtyrýshylar úshin biliktilikti arttyrý baǵdarlamalary ázirlenedi, onyń ishinde halyqaralyq taǵylymdamalar men UEFA lıtsenzııalaryn alý múmkindigi qarastyrylady. Sporttyq ınfraqurylym tek iri qalalarda ǵana emes, aýyldyq eldi mekenderde de damytylady.
Eske salsaq, buǵan deıin «Aqtóbe» fýtbol klýbynyń jańa ıesi týraly naqty aqparat jarııalanǵan edi: klýb birneshe aı ishinde tolyq rásimdeletin qujattardan keıin jergilikti jankúıer ári kásipkerdiń menshigine ótedi.
Sondaı-aq, Qyzylorda oblysynyń «Qaısar» klýby da 30 qazannan bastap resmı túrde jeke basqarýǵa berilgen edi.