Qaraǵandy ferroqorytý zaýytyna 700 myń teńge aıyppul salyndy
QARAǴANDY. KAZINFORM – Qaraǵandy qalasynyń ákimshilik quqyqbuzýshylyqtar jónindegi aýdanaralyq soty «YDD CORPORATION» JShS-ne qatysty is qaraldy. 4 adamnyń ómirin qıǵan oqıǵa kezinde zaýyt ókilderi oqıǵa ornyna TJD qyzmetkerlerin kirgizbegeni anyqtaldy, dep habarlaıdy Kazinform tilshisi.
Tergeý anyqtaǵandaı, 20 shildede bolǵan pesh daryly kezinde oqıǵa ornyna kelgen Qaraǵandy oblysy Tótenshe jaǵdaılar departamenti qyzmetkerlerine «YDD CORPORATION» JShS-niń senimdi ókilderi oqıǵa ornynda bolǵan jaǵdaı týraly aqparat berýden bas tartyp, TJD qyzmetkerlerin 40 mınýt zaýyt aýmaǵyna kirgizbegen.
«Osy fakti boıynsha Qaraǵandy oblysynyń TJD-men „YDD CORPORATION“ JShS-ne qatysty ÁQBtK-niń 462-babynyń 1-bóligimen (memlekettik baqylaý jáne qadaǵalaý organdaryna qyzmettik mindetterin oryndaýǵa kedergi jasaý) faktisi boıynsha ákimshilik is qozǵap, sotqa joldandy. Sotta «YDD CORPORATION» JShS-niń ókili taǵylǵan ákimshilik quqyq buzýshylyq boıynsha kinásin moıyndamady, «YDD CORPORATION» JShS-niń kinási barlyǵy is boıynsha keltirilgen dáleldermen rastaldy», - dep málimdedi Qaraǵandy qalasynyń Ákimshilik quqyqbuzýshylyqtar jónindegi mamandandyrylǵan aýdanaralyq sotynyń baspasóz qyzmeti.
Sotta «YDD CORPORATION» JShS ÁQBtK-niń 462-babynyń 1-bóligimen ákimshilik jaýapkershilikke tartylyp, osy baptyń sanktsııa sheginde 200 AEK (738 400 teńge) mólsherinde ákimshilik aıyppul túrindegi jaza taǵaıyndaldy.
Sot qaýlysy zańdy kúshine eńgen joq.
Eske sala keteıik, 2024 jyldyń 20 shildesinde «YDD CORPORATION» jaýapkershiligi shekteýli seriktestiginiń ferroqortypa zaýytynda pesh jarylyp, saldarynan segiz adam zardap shekken edi. Tórt adam kóz jumdy.
