Qaraǵandy, Astana jáne Aqtóbe qalalaryna esirtki jetkizýdi uıymdastyrýshylar sottaldy

ASTANA. KAZINFORM - Bıyl sáýirde esirtki ótkizdi degen aıyppen Qazaqstannyń úsh azamatyna qatysty sot úkimi zańdy kúshine endi, dep habarlaıdy QR Ulyttyq qaýipsizdik komıtetiniń baspasóz qyzmeti.

Olar Qylmystyq kodekstiń 297-babynyń 3-bóligi boıynsha (Esirtki, psıhotroptyq zattardy, sol tektesterdi ótkizý maqsatynda zańsyz ıemdený, saqtaý, tasymaldaý, olardy jóneltý ne ótkizý) 7 jyldan 8 jylǵa deıin bas bostandyǵynan aıyryldy.

Atap aıtqanda, UQK qylmystyq shemanyń uıymdastyrýshysy men onyń eki sybaılasyn ustady.

Tintý kezinde 4 kg «mefedron», 14 g kokaın, 500 g aýǵan gashıshi, 15 g ketamın jáne 200 marka «LSD» tárkilengen.

Tergeý barysynda sottalǵandardyń ınternet-alańy arqyly Qaraǵandy, Astana jáne Aqtóbe qalalaryna aımaqaralyq esirtki jetkizýdi uıymdastyrǵanyn anyqtady.

- Esirtki bıznesine qarsy is-sharalar jalǵasýda, - delingen Ulttyq qaýipsizdik komıtetiniń baspasóz qyzmeti tartqan aqparatta.

Osyǵan deıin Jezqazǵan qalasynyń esirtki jarnamalaǵan turǵynyna sot úkimi shyqqany týraly jazdyq.