Qaraǵandy – Astana tasjolynda polıtsııanyń kúshimen myńǵa jýyq kólik qaýipsiz jerge shyǵaryldy
QARAǴANDY. KAZINFORM – Qaraǵandy oblysynda aýa raıynyń qolaısyzdyǵyna baılanysty keıbir jol bólikterinde qozǵalys qıyndap, kólikterdi ótkizip jiberý úshin arnaıy tehnıka men polıtsııanyń kómegi qajet boldy.
Temirtaý qalasynan Aqmola oblysynyń shekarasyna qaraı patrýldik polıtsııanyń úsh ekıpajy jolǵa shyǵyp, avtokólikter kolonnasyn alyp ótti. Bul aımaqta aýa raıynyń qolaısyzdyǵy men engizilgen shekteýler kólik qozǵalysyna qıyndyq týdyrǵan.
Kolonnanyń aldynda «QazAvtoJol» AQ-nyń arnaıy tehnıkasy júrip, joldy qardan tazartyp otyrdy. Al polıtsııa qyzmetkerleri kólikterdiń jyldamdyǵy men araqashyqtyǵyn qatań baqylap, beıbereket qozǵalys pen qaýipti manevrlerdiń aldyn aldy.
Kolonnany patrýldik polıtsııa batalony komandıriniń orynbasary Suńǵat Abylqastyń ekıpajy basqaryp júrdi. Qozǵalys bastalar aldynda ol júrgizýshilerge jeke ózi nusqaý ótkizip, araqashyqtyqty qatań saqtaý, kolonna ishinde birkelki ári úılesimdi qozǵalý jáne polıtsııa qyzmetkerleriniń talaptaryn múltiksiz oryndaý qajettigine erekshe toqtaldy.
Polıtsııa málimetinshe, kolonna qozǵalǵan sátte Qaraǵandy — Astana respýblıkalyq tasjolynyń Temirtaý mańyndaǵy aqyly jol beketi aýmaǵynda shamamen myńǵa jýyq kólik jınalǵan. Qozǵalysty súıemeldeý joldyń osy bóligindegi kólik júktemesin kezeń-kezeńimen azaıtýǵa jáne avtokólikterdiń oblys aýmaǵynan ótetin kezde jaısyz jaǵdaılardyń bolmaýyn qamtamasyz etýge múmkindik berdi.
Qazirgi ýaqytta respýblıkalyq mańyzdaǵy tasjoldaǵy ahýal polıtsııa departamenti men jol qyzmetteriniń turaqty baqylaýynda. Aldaǵy qozǵalysqa qatysty sheshimder aýa raıy jaǵdaıy men joldyń jaǵdaıyna qaraı qabyldanyp jatyr.
Osyǵan deıin Qaraǵandy oblysynda jabyq jol ýchaskelerinen 600-den astam kólik qaýipsiz jerge shyǵarylǵany týraly jazdyq.