Qaraǵandy — Astana tasjolynda polıtseıler boran kezinde 3,5 myńnan asa kólikti alyp júrdi

Kóriný deńgeıi múldem tómen bolǵanyna qaramastan polıtseıler júrgizýshilerge táýlik boıy kómektesip, avtokólikter kolonnasyn súıemeldep, qaýipsiz jerge alyp júrdi.

Qaraǵandy oblysynda eki táýlik boıy soqqan qatty boran respýblıkalyq mańyzy bar avtojoldardaǵy jaǵdaıdy edáýir kúrdelendirdi. Qalyń qar, ekpindi jel jáne kóriný deńgeıi tym tómendep ketýi saldarynan trassalarda qozǵalý asa qaýipti boldy.

Osyndaı jaǵdaıda Qaraǵandy oblysy Polıtsııa departamentiniń patrýldik polıtsııa batalonynyń qyzmetkerleri kúsheıtilgen qyzmet rejımine kóship, táýlik boıy joldarda jumys atqaryp jatyr. Olar júrgizýshiler men jolaýshylarǵa kómek kórsetip, jol qozǵalysynyń qaýipsizdigin qamtamasyz etti.

Eń kúrdeli jaǵdaı Qaraǵandy — Astana avtojolynda qalyptasty. Qolaısyz aýa raıy kezinde ondaǵan kólik jolda qalyp qoıdy. Polıtseıler jedel túrde oqıǵa ornyna kelip, aqtútek borannan jol kórinbeı qalǵandyqtan júrgizýshilerge baǵyt-baǵdar berdi, kólikterdi qaýipti ýchaskelerden shyǵaryp, adamdardy qaýipsiz jerlerge jetkizdi.

Qutqarýshylarmen birlesip, polıtsııa qyzmetkerleri kólikterdi qar qursaýynan shyǵaryp, tehnıkalyq aqaýlardy joıýǵa kómektesti jáne jol qozǵalysynyń qaýipsizdigin qamtamasyz etti.
11 naýryz kúni boran sál basylyp, kóriný jaqsarǵannan keıin patrýldik polıtsııa batalony kólikterdi kolonnamen súıemeldeýdi uıymdastyrdy. Bul eń kúrdeli jol ýchaskelerinen kólikterdi qaýipsiz ótkizýge múmkindik berdi.

Polıtsııa málimetinshe, Qaraǵandydan Astana baǵytyna qaraı shamamen 600 avtokólik, al Astanadan Qaraǵandyǵa qaraı 3000-nan astam kólik súıemeldep jetkizildi. Operatsııany Qaraǵandy oblysy patrýldik polıtsııa batalonynyń komandıri Medet Nurmuhanov úılestirdi. Qaýipsizdik maqsatynda kolonnalardyń qozǵalys jyldamdyǵy saǵatyna shamamen 30 shaqyrym deńgeıinde saqtaldy. Polıtseılerdiń aıtýynsha, mundaı rejım boran men shekteýli kóriný jaǵdaıynda jol-kólik oqıǵalarynyń aldyn alýdyń eń tıimdi tásilderiniń biri sanalady.
Aýa raıy birshama jaqsarǵanyna qaramastan, polıtsııa qyzmetkerleri joldarda kezekshilik atqarýdy jalǵastyryp, jaǵdaıdy baqylaýda ustap, jol qozǵalysyna qatysýshylarǵa kómek kórsetip jatyr.

Qazir qolaısyz aýa raıy jaǵdaıyna baılanysty Qaraǵandy — Astana avtojoly jabyq kúıinde qalyp otyr. Polıtseıler júrgizýshilerdi qaýipsizdik talaptaryn saqtaýǵa jáne aýa raıy turaqtalǵanǵa deıin múmkindiginshe jolǵa shyqpaýǵa shaqyrady.

Buǵan deıin Qazaqstannyń jeti oblysynda qolaısyz aýa raıyna baılanysty trassalarda qozǵalysqa shekteý engizilgeni habarlanǵan bolatyn.

Eske salsaq, «Qazgıdromet» RMK 2026 jylǵy 12 naýryzda Qazaqstannyń barlyq 17 oblysynda eskertý jarııalady.