Aqtóbede eki bala terezeden qulap ketti
AQTÓBE. KAZINFORM - Aqtóbe qalasynda eki bala kópqabatty úıdiń besinshi qabatynan qulap ketti. Ekeýi de jansaqtaý bólimine tústi.
Aqtóbe oblystyq Polıtsııa departamenti baspasóz qyzmetiniń habarlaýynsha, 6 jáne 7 mamyr kúnderi eki bala besinshi qabattan qulap ketti. Biri eki, ekinshisi 5 jasar.
- Qaraýsyz qalǵan eki jasar bala terezeden qulaǵan. Bala aýrýhananyń jansaqtaý bólimine jetkizildi. Jaǵdaıy aýyr. 7 mamyrda keshki ýaqytta bes jasar balanyń da kópqabatty úıdiń besinshi qabatynyń terezesinen qulaǵany týraly taǵy bir habar tústi. Bala oblystyq balalar aýrýhanasynyń jansaqtaý bólimshesine jatqyzyldy. Anasy men balasy oblys ortalyǵyna Shalqar aýdanynan kelgeni anyqtaldy. Balalardy úıde jalǵyz qaldyrýǵa bolmaıdy. Sonymen birge balany balkonǵa jalǵyz shyǵarmaǵan durys,- dedi oblystyq Polıtsııa departamenti baspasóz qyzmetiniń jetekshisi Erbolat Sarqulov.
Aıta keteıik, jyl basynan beri oblysta 5 bala terezeden qulap ketti.