Karachaganak Petroleum Operating (QPO) konsortsıýmy basshylaryna qatysty qylmystyq is qozǵaldy

Bul týraly búgin Astanada QR Ekonomıkalyq qylmysqa jáne sybaılas jemqorlyqqa qarsy agenttigi tergeý departamenti bastyǵynyń orynbasary Dýlat Baıjanov málim etti, dep habarlaıdy QazAqparat.

«Bul qylmystyq is ókiletti organ bekitken normadan munaıdy 1 mln. 100 myń tonnaǵa jáne kondensatty 94 myń tonnaǵa artyq óndirýine qatysty qozǵaldy. Onyń quny 104 mlrd. teńgeni qurap otyr», dedi D. Baıjanov.

QPO konsortsıýmynda basshylardyń quramy kóp ekenin jetkizgen ol, «Konsortsıýmǵa 4 sheteldik kompanııa biriktirilgen. Ózderińiz bilesizder, onda aǵylshyndar, nıderlandtar, amerıkandyqtar jáne 15 paıyz úleste LýkOıl bar. Sondyqta, mundaǵy ár kompanııa óz úlesine qaraı jaýap beredi. Biz qazirgi kezde atalǵan sharýany kim júzege asyrǵanyn naqty bilmeımiz. Tergeý sońynda konsortsıýmdaǵy júıe quraýshy 4 kompanııa basshylarynyń qaısy kináli ekenin anyqtaımyz», dedi ol.

Aıta keteıik, QPO konsortsıýmy basshylaryna qatysty qylmystyq is 190-shy baptyń 2-bólimi boıynsha qozǵalǵan.

D. Baıjanovtyń sózine qaraǵanda, atalǵan qylmystyq iske baılanysty naqty aqparat 1 aıdan keıin belgili bolmaq.