Qarabek kólinde móńke balyqtyń neden qyrylǵany anyqtalyp jatyr

NUR-SULTAN. QazAqparat - Ekologııa, geologııa jáne tabıǵı resýrstar mınıstrligi Soltústik Qazaqstan oblysynda Qarabek kólinde qyrylǵan balyqqa qatysty túsinik berdi, dep habarlaıdy QazAqparat.

«3 shildede Soltústik qazaqstan oblysy Qyzyljar aýdanynyń jergilikti turǵyndarynan Qarabek kólinde balyq (móńke balyǵynyń) qyrylǵany týraly aqparat kelip tústi. Janýarlardyń qyrylý qaýpi jáne ólimi anyqtalǵan kezdegi ózara is-qımyl syzbasyna sáıkes barlyq múddeli organdar habardar etildi. Atalǵan fakti boıynsha Esil oblysaralyq basseındik balyq sharýashylyǵy ınspektsııasy, Soltústik qazaqstan oblysy ákimdigi, Soltústik qazaqstan oblysy boıynsha ekologııa departamenti jáne QR AShM Veterınarlyq baqylaý jáne qadaǵalaý komıtetiniń Soltústik Qazaqstan oblystyq aýmaqtyq ınspektsııasy ókilderi atalǵan sý aıdynyna birge bardy. Tekserý barysynda sý qoımasynyń soltústik-shyǵys jaǵalaýynda 100 kg móńke balyq ólgeni anyqtaldy» dep málim etti vedomstvodan.

Kelesi kúni de balyq jınaý jalǵasyp, búginde kólden alynǵan 560 kg móńke joıylǵan.

Veterınarlyq qyzmet pen ekologııa departamentiniń mamandary zertteý júrgizý úshin sý synamasy men balyq ushasyn aldy.

«Balyqtyń qyrylý sebebi týraly aqparat zertteý nátıjelerin alǵannan keıin qosymsha habarlanady» dep atap ótti mınıstrlik.

Aıta keteıik, biz buǵan deıin Soltústik Qazaqstan oblysy Beskól aýylyndaǵy Qarabek kólinde 400 kg balyq qyrylǵanyn jazǵan bolatynbyz.

Qarabek kóliniń aýmaǵy - 10 ga. Qyzyljar aýdany Beskól aýylynyń janynda ornalasqan. Bul rezervýardaǵy balyqtyń túrlik quramy - móńke. Bul sý aıdyny jergilikti mańyzy bar balyq sharýashylyǵy sý aıdyndarynyń tizbesine kirmeıdi.