Qarabek kólinde balyqtyń neden qyrylǵany belgili boldy - SQO
PETROPAVL. QazAqparat – Soltústik Qazaqstan oblysynda mamandar Qarabek kólinde balyqtyń neden qyrylǵanyn aıtty, dep habarlaıdy QazAqparat tilshisi.
SQO Qyzyljar aýdany Beskól aýylyndaǵy Qarabek kólinde balyqtyń qyrylýyna aýa raıy sebep bolǵan.
«Maýsymnyń sońy men shilde aıynyń basynda birneshe kún ystyq jáne tymyq aýa raıy saqtaldy. Osyǵan baılanysty kól betinde úldir paıda bolǵan. Mundaı juqa qabyq ottegini ótkizbeıdi. Kól sýynda organıka joǵary, ol shirý arqyly ottegini joıady. Saldarynan balyq ottegi jetispeýshiliginen qyrylyp qalǵan», - deıdi Esil oblysaralyq basseındik
balyq sharýashylyǵy ınspektsııasynyń bólim basshysy Ildar Kákimov.
Mamannyń aıtýynsha, Qarabek kólinde 560 kg balyq qyrylǵan.
Esterińizge salaıyq, 4 shilde kúni áleýmettik jelide Qyzyljar aýdany Beskól aýylynyń turǵyndary jergilikti kólde balyqtyń qyrylyp jatqanyn jarııalap, jurttyń nazaryn aýdarǵan edi.
