Qarabatandaǵy órtten keıin eldegi barlyq vahtalyq kentter tekseriledi
ASTANA. QazAqparat - Atyraý oblysy Qarabatan vahtalyq stansysyndaǵy órtten keıin Bas prokýratýra eldegi barlyq vahtalyq kentterdi tekseredi, dep habarlaıdy QazAqparat QR Eńbek jáne halyqty áleýmettik qorǵaý vıtse-mınıstri Nurjan Áltaevqa silteme jasap.
"Qarabatandaǵy órt oqıǵasynan soń, Bas prokýratýraǵa barlyq vahtalyq kentterdi tekserý týraly hat joldadyq. Bas prokýratýra tekserýdiń mindetti túrde bolatynyn habarlady. Qazir halyq kóp jınalatyn oıyn-saýyq ortalyqtary tekserilip jatyr. Sodan keıin eldegi vahtalyq kentterdi tekserý jumystary bastalady", - dedi Nurjan Áltaev eńbek jáne ónerkásip qaýipsizdigine arnalǵan "KIOSH-2018" halyqaralyq konferentsııasynda jýrnalısterge bergen suhbatynda.
Onyń aıtýynsha, órt oqıǵasyna aıypty dep tanylǵan jumys berýshi jaýapkershilikke tartylady.
"Qarabatandaǵy órttiń shyǵýyna jumys berýshi kináli. Birinshiden, mert bolǵandardyń otbasyna jáne jaraqat alǵandarǵa barlyq qajetti materıaldyq kómek kórsetilip jatyr. Ekinshiden, jumys berýshi aıypty bolǵandyqtan, sáıkes jaýapkershilikke tartylady. Úkimettik komıssııa retinde biz faktiler men órt sebebin anyqtap berdik. Jaýapkershilik jaǵy quqyq qorǵaý qorǵaý organdarynyń jumysy", - dep jaýap berdi ol jýrnalıster suraǵyna.
Sonymen birge, vıtse-mınıstr qurylys salasynda barlyq tulǵalarǵa baqylaý júrgizýdi usynǵandaryn jetkizdi.
"Qarabatandaǵy tekserý jumystarynan keıin tutas qurylys salasyna baqylaý júrgizýdi usynǵan edik. Quqyqbuzýshylyqtardyń basym bóligi qosalqy merdigerler tarapynan anyqtalady. Máselen, qandaı da bir qurylys kompanııasy tolyq baqylaýda bolady da, qosalqy merdigerleri aılyqty qolma-qol tólep, eńbek qatynastary týraly shart jasaspaıdy, eńbek etýshilerdiń quqyǵyn buzady", - dep túsindirdi N. Áltaev.
Eske sala ketsek, naýryz aıynda Atyraý oblysy Qyzylqoǵa aýdanynda salynyp jatqan Qarabatan «Gaztýrbınalyq elektr stansysynyń» qurylys aýmaǵyndaǵy jataqhanadan órt shyǵyp, jeti jumysshy qaza tapty.
Arnaıy qurylǵan úkimettik komıssııanyń málimdeýinshe, jataqxanada ortalyqtandyrylǵan jylý júıesi bolmaǵan. Sol sebepti árbir bólmede jylytý qurylǵylary qoıylǵan. Saldarynan elektr symdar qatty qyzyp ketip, jataqhana órtke oranǵan.
