Qarabatandaǵy órt: Kompanııa marqumdardyń týystaryna depozıt ashty
ASTANA. QazAqparat - Qarabatandaǵy «Gaz týrbınaly elektrstansasy» qurylys alańyndaǵy bolǵan apat jaǵdaıyn túsindirý jóninde komıssııa jumysy jalǵasyp jatyr. Bul týraly QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap habarlaıdy.
Baspasóz qyzmetiniń habarlaýynsha, 2018 jyly 2 naýryzda «PSI Stroy Industriya»JShS jumysshylary turatyn konteınerlik jataqhanada bolǵan qaıǵyly oqıǵany teksergen arnaıy úkimettik komıssııany QR Eńbek jáne halyqty áleýmettik qorǵaý vıtse-mınıstri Nurjan Altaev basqardy. Komıssııa quramynda QR ІІM Tótenshe jaǵdaılar jónindegi komıtet ókilderi, Atyraý obylysy ákimdiginiń qyzmetkerleri jáne «PSI Stroy Industriya» JShS-niń jumysshylary men jumys berýshileri de boldy.
Oqıǵa ornyna kelgen komıssııa músheleri órt shyqqan jatahanadan bólek jumysshylar turatyn taǵy 6 jataqhanany teksergen. Nátıjesinde, olarda sanıtarlyq jáne órt qaýipsizdigi erejeleri saqtalmaǵany anyqtalyp otyr. Úkimettik komıssııa oqıǵanyń sebep-saldary anyqtalǵanǵa deıin jataqhana jumysyn toqtatý týraly sheshim qabyldady.
Aıta ketý kerek, gaz týrbınaly elektr stansa qurylysy 2016 jyldyń qazan aıynda bastalǵan edi. Bul qurylys nysanynda 850 adam bar. Olar eki aýysym kestesimen jumys isteıdi. Jumysshylardyń barlyǵy 7 jataqhanamen qamtylǵan.
«Tergeýdiń aldyn-ala qorytyndylary boıynsha alǵashqy órt shyqqan aýmaq keptirý bólmesi bolýy yqtımal ekendigi anyqtaldy. Sebebi onda konvektorly elektr jylytqyshy ornatylǵan. Órttiń tehnıkalyq sebepteri elektr symdarynyń qysqa tuıyqtalýy saldarynan jaqyn mańdaǵy turmystyq zattar janýy múmkin. Aldyn-ala tergeýdiń qorytyndysy boıynsha, osy toptaǵy jazataıym oqıǵalar QR Eńbek kodeksiniń 186-babynyń 2-bóliminiń 2 tarmaqshasyna sáıkes eńbek qatynastaryna baılanysty bolyp otyr. Jumys berýshi árbir jábirlenýshige jáne qaıtys bolǵan adamǵa jazataıym oqıǵaǵa qatysty H1 túrinde akt toltyrdy», - delingen habarlamada.
«PSI Stroy Industriya» JShS-niń basshylyǵy órtten zardap shekkender men qaza bolǵan jumysshylardyń otbasyna jan-jaqty kómek kórsetken. Kompanııa oqıǵadan qaza bolǵan azamattardyń denesin jeke ushaqpen turǵylyqty jerine jetkizý, jerleý rásimine ketken shyǵyndardy tolyq ótep, marqumdardyń týystaryna depozıtter ashyp bergen. Qazirgi kezde jumys berýshi kompanııa materıaldyq kómekke 50 mln teńge bólip, bul qarajat osy shottar arqyly berildi.
Kompanııanyń barlyq qyzmetkerleri jumystaǵy jazataıym oqıǵalardan saqtandyrylǵan. Osylaısha, qaıtys bolǵan adamdardyń asyraýyndaǵy jandar Qazaqstan Respýblıkasynyń zańnamasynda kózdelgen saqtandyrý tólemderin alatyn bolady.
Buǵan deıin habarlaǵanymyzdaı, Atyraý qalasynan shamamen 40 shaqyrym jerdegi Qyzylqoǵa aýdanynda salynyp jatqan Qarabatan «Gaztýrbınalyq elektr stansysynyń» qurylys aýmaǵynda ornalasqan jataqhana órtengen bolatyn.
Qaıǵyly oqıǵa saldarynan 6 adam qaza bolyp, 4-eýi zardap shekken edi.
