Qarabatanda qap-qara tútinniń qaıdan shyǵyp jatqany anyqtaldy
ATYRAÝ. QazAqparat - Atyraý oblysynyń ekologııa departamenti Qarabatan kenti aýmaǵynda atmosferalyq aýada qara tútin izderi bar lastaýshy zattardyń shyǵarylǵanyn anyqtady. Bul jóninde Ekologııa, geologııa jáne tabıǵı resýrstar mınıstrligine silteme jasap QazAqparat habarlaıdy.
Aıta keteıik, taıaýda birqatar basylymda jáne áleýmetitk jelilerde Qarabatanda aýaǵa taraǵan qoıý qara tútinniń sýreti jarııalanǵan edi.
Osyǵan baılanysty atalmysh departament qyzmetkerleri mobıldi jyljymaly zerthanaǵa Qarabatan aýdanyna bardy.
«Osy qara tútin Nort Kaspıan Opereıtıng Kompanı N.V. kompanııasynyń fılıaly «Bolashaq» MGKDQ zaýytynyń shyraqty qondyrǵysynan shyǵyp jatqany anyqtaldy. Sondaı-aq departament qyzmetkerleri MGKDQ zaýytynyń SQA shekarasynyń irgeles aýmaǵyndaǵy atmosferalyq aýany ólshedi» delingen habarlamada.
Osy ónerkásiptik obektige jospardan tys tekserý júrgiziletin boldy. Onyń nátıjesi qosymsha habarlanady.
